Tækniþróunarsjóður kynnir úthlutun

Katrín Júlíusdóttir iðnaðarráðherra með hluta
styrkþega Tækniþróunarsjóðs.  

Iðnaðarráðherra, Katrín Júlíusdóttir, stýrði kynningu Tækniþróunarsjóðs á úthlutun ársins. Á árinu bárust 267 umsóknir um styrki sem er veruleg aukning frá fyrra ári þegar bárust 91 umsókn í sjóðinn. Auk þess bárust 19 umsóknir um öndvegisstyrki úr sjóðnum. Aukin umsóknarþungi í sjóðinn undirstrikar mikilvægi sjóðsins við að styðja við nýsköpun í atvinnulífinu sem leiðir til nýrra starfa og almennt aukinnar verðmætasköpunar á Íslandi.

Sjóðurinn veitti alls 465 Mkr til 76 nýrra verkefna auk þess sem 40 verkefni fengu framhaldstuðning á árinu en sjóðurinn veitir verkefnum styrki í allt að þrjú ár. Að auki var úthlutað samtals 60 Mkr til fjögurra öndvegisverkefna í þremur undirflokkum, vistvænt eldsneyti, vistvænar byggingar og skipulag, og sjálfbær ferðaþjónusta.

Kynningin var  haldin í Þjóðmenningarhúsinu og voru fimm verkefni kynnt sérstaklega. Valdimar Össuararson kynnt þróun hverfils til virkjunar á hægstraumi; Sigmar Guðbjörnsson tæki til að setja í spendýr til að fylgjast með líkamlegu ástandi; Jóhann Örlygsson framleiðslu eldsneytis úr lífmassa; Kjartan Ragnarsson miðaldaböð við Deildartunguhver og Sveinbjörn Höskuldsson vél- og hugbúnað til svefngreininga.