Forsíðufréttir

HERA (Humanities in the European Research Area) er samstarf 13 stofnana sem fjármagna rannsóknir í hugvísindum. Búið er að opna fyrir umsóknir á tveimur rannsóknasviðum, annars vegar “Cultural Dynamics: Inheritance and Identity” og hins vegar “Humanities as a Source of Creativity and Innovation”. Umsóknarfrestur er til 7. apríl. Nánari upplýsingar um áætlunina má nálgast á heimasíðu HERA.

Vísindanefnd og tækninefnd boða til opins fundar um mótun nýrrar vísinda- og tæknistefnu miðvikudaginn 28. janúar kl. 15:00 - 17:30 í Nýja Kaupþingi.

Stjórn Rannsóknasjóðs hefur lokið við úthlutun til nýrra rannsóknaverkefna fyrir árið 2009; um 314 milljónum króna var úthlutað. Þrjár tegundir styrkja voru í boði: öndvegisstyrkir, rannsóknastöðustyrkir og verkefnastyrkir. Alls bárust 237 umsóknir í Rannsóknasjóð að þessu sinni og var 51 þeirra styrkt eða 21,5% (fjöldi). Sótt var um ríflega 1,3 milljarða króna en um 314 milljónum króna veitt eða 23,8% (upphæð). Meðalupphæð umsókna var um 5,5 milljónir króna en meðalupphæð styrkja nú er ríflega 6,1 milljón króna. Úthlutunina ásamt nánari upplýsingum má nálgast hér.

Vísindanefnd og tækninefnd boða til opinna funda um mótun nýrrar vísinda- og tæknistefnu í Nýja Kaupþingi banka hf., Borgartúni 19, Reykjavík. Fundir verða dagana 21. janúar, 28. janúar og loks 4. mars.

Rannís verður með kynningu á stuðningi við rannsóknir, alþjóðasamstarf og nýsköpun í Virkjun, miðstöð fólks í atvinnuleit, á Vellinum fimmtudaginn 22. janúar kl. 16:30.

Fyrir helgi sóttu fulltrúar Rannís Akureyri heim og kynntu Eyfirðingum og nærsveitarmönnum starfsemina og hvernig hún gæti nýst fræðimönnum, frumkvöðlum og fyrirtækjum.

Kynning á tækifærum og styrkjum í Evrópusamstarfi verður haldin á Háskólatorgi fimmtudaginn 15. janúar 2009 kl. 15-18. Þar gefst færi á að hitta fulltrúa evrópskra samstarfsáætlana á Íslandi og kynna sér möguleika á styrkjum og samstarfi á öllum sviðum menntamála, rannsókna, vísinda, nýsköpunar, menningar og atvinnulífs. Sameiginleg upplýsingasíða verður einnig opnuð á slóðinni www.evropusamvinna.is

Stjórn Tækniþróunarsjóðs hefur skilgreint nýjar áherslur og býður þrjá nýja styrkjaflokka í ár: Öndvegisstyrki, frumherjastyrki og brúarstyrki þar sem lögð er áhersla á uppbyggingu innviða. Að auki eru boðnir hefðbundnir verkefnisstyrkir. Umsóknarfrestur í Tækniþróunarsjóð er 16. febrúar. Sérstakur umsóknarfrestur er fyrir öndvegisstyrki, 2. mars.