Forsíðufréttir

Vísindanefnd Vísinda- og tækniráðs hefur skipað fagráð Rannsóknasjóðs til næstu tveggja ára. Fagráðin hafa það hlutverk að vera ráðgefandi fyrir stjórn Rannsóknasjóðs við úthlutanir úr sjóðnum. Sjá má skipun fagráðanna hér.

Aldrei hafa fleiri gestir sótt Vísindavöku eins og síðasta föstudag, en alls sóttu 2.790 gestir vökuna til að kynna sér viðfangsefni vísindamanna frá um 70 sýnendum. Rannís vill þakka sýnendum, sem lögðu á sig ómælda vinnu til að vera með, styrktaraðilum og samstarfsaðilum fyrir frábært samstarf. Myndir af Vísindavöku verða settar inn á vefinn innan tíðar. Hlökkum til að sjá ykkur á Vísindavöku 2010!

Bandalag þýðenda og túlka verður fimm ára miðvikudaginn 30. september. Í tilefni af afmælinu verður haldið opið málþing um þýðingar og túlkun. Þar verða reifuð ýmis atriði sem lúta að starfsvettvangi félagsmanna, s.s. gæði bókmenntaþýðinga, þýðingarminni og túlkun í alþjóðlegu umhverfi. Seinni hluti þingsins verður helgaður menntun og ráðningu þýðenda ef til Evrópusambandsaðildar kemur. Yfirmaður útvistunarmála hjá þýðingamiðstöð Evrópusambandsins kemur sérstaklega til að kynna starfsemi miðstöðvarinnar.

Afmælisþingið verður haldið á Þjóðminjasafni Íslands við Suðurgötu milli kl. 13 og 17 miðvikudaginn 30. september.

Mánudaginn 28. september stóð Rannís að kynningarfundi um þátttökutækifæri Íslendinga í þjálfunarnetum innan Mannauðsáætlunar ESB. Um 35 manns mættu á fundinn. Aðalfyrirlesarari var Dr. Kaisa Hellevuo frá Evrópusambandinu.

Vísindavaka er í dag föstudaginn 25. september í tilefni af Degi evrópska vísindamannsins og er hún haldin á sama tíma í helstu borgum Evrópu. Vísindavakan verður í Listasafni Reykjavíkur Hafnarhúsinu kl. 17-22. Menntamálaráðherra, Katrín Jakobsdóttir, opnar Vísindavöku og afhendir verðlaun í teiknisamkeppni barna og síðan hefjast atriði á sviði þar sem Sprengjugengið, Vísindavefurinn og Stjörnuskoðunarfélag Seltjarnarness mæta meðal annarra. Sýnendur hafa aldrei verið fleiri og mun fjöldi gesta sækja Vísindavökuna þannig að búast má við þröng á þingi! Það er greinilega mikill hugur í vísinda- og fræðimönnum þjóðarinnar og mikil gróska í rannsókna- og nýsköpunarstarfi.

RANNÍS mun halda opinn kynningarfund um þjálfunarnet mánudaginn 28. september með þátttöku fulltrúa Evrópusambandsins. Fundurinn verður haldinn milli kl. 10.00 og 12.00 í húsnæði Endurmenntunar HÍ að Dunhaga 7.

Tvö Vísindakaffi verða haldin á Norðurlandi í kvöld í tengslum við Vísindavöku 2009. Vísindakaffið á Akrueyri ber yfirskriftina: "Mun Eyjafjörður verða helsti vaxtarbroddur Íslands?" og er haldið á Friðriku V., og á Sauðárkróki er titill Vísindakaffisins "Er vit í vísindum á landsbyggðinni? - Hvert er förinni heitið?" en það er haldið á Kaffi Krók.

Umræðan um hugsanlega aðild Íslands að ESB verður í brennidepli á Vísindakaffi í kvöld, en þá mun Magnús Árni Magnússon forstöðumaður Félagsvísindastofnunar HÍ fjalla um hvernig umræðan hefur þróast og hvernig orðræða er notuð í því samhengi. Hann mun líta til umræðunnar á Möltu, en þegar þessi litla eyþjóð gekk inn í ESB fyrir nokkrum árum, einkenndist umræðan um margt af svipuðum aðferðum og hér. Harðsnúin klíka föðurlandssvikara á Vísindakaffi í kvöld kl. 20.00-21.30 á Súfistanum í Iðuhúsinu!

Annað Vísindakaffið er í kvöld, 22. sept. kl. 20:00-21:30 á Súfistanum, Iðuhúsinu Lækjargötu. Dr. Valdimar Sigurðsson frá viðskiptadeild Háskólans í Reykjavík  fjallar um neytendasálfræði og markaðssetningu matvæla í verslunum. Er eitthvað að marka neytendur? Þetta er efni sem snertir okkur öll. Þiggið kaffiboð Rannís og mætið á Vísindakaffi í kvöld!

Fyrsta Vísindakaffið er í kvöld, mánudag 21. sept. kl. 20:00-21:30 á Súfistanum, Iðuhúsinu Lækjargötu 2. Dr. Guðrún Nordal forstöðumaður Stofnunar Árna Magnússonar fjallar um hvernig fíkn ungra karlmanna í völd og fé réði miklu um fall í íslensku samfélagi í tíð Sturlunga. Þetta þykir mörgum ríma óþægilega við fjölda atburða í nútímanum. Alvarlegt málefni með léttum undirtóni!