Reglur og leiðbeiningar 2011
Reglur og leiðbeiningar fyrir styrkárið 2011
I. Formáli formanns stjórnar Rannsóknasjóðs
Rannsóknasjóður varð – eins og allt annað á Íslandi – fyrir miklum búsifjum þegar efnahagur þjóðarinnar hrundi haustið 2008. Stjórnvöld tóku þá mikilvægu ákvörðun við fjárlagagerð fyrir árið 2010 að standa vörð um opinbera samkeppnissjóði og gekk það eftir. Rannsóknasjóður fékk 815 milljónir til ráðstöfunar á árinu 2010, sömu upphæð og sjóðurinn hafði fengið á fjárlögum 2009. Þetta sýnir mikla framsýni stjórnvalda á erfiðum tímum og er auðvitað vísir að forgangsröðun þegar kemur að niðurskurði. Mjög lágt árangurshlutfall nýrra verkefna í Rannsóknasjóði fyrir styrkárið 2010 (um 15%) kom því mörgum í opna skjöldu. Á það ber þá að líta að eldri skuldbindingar sjóðsins (framhaldsverkefni) eru þungar og þegar styrkjum var úthlutað til nýrra verkefna árið 2008 var öðruvísi umhorfs í íslensku samfélagi. Þegar kom að úthlutun til nýrra verkefna árið 2009 tók þáverandi stjórn mjög varfærin skref sem verða til þess að ef Rannsóknasjóður heldur sömu fjárhæð á fjárlögum fyrir árið 2011 (815 milljónum) gæti úthlutun til nýrra styrkja 2011 verið á svipuðu reki og fyrir styrkárið 2010 eða um 270 milljónir króna. Allar vangaveltur af þessu tagi eru þó háðar því hvað fjárlög fyrir árið 2011 bera í skauti sér. Hitt er svo annað mál að krónutala segir ekki nema hálfa söguna. Þrátt fyrir að Rannsóknasjóður hafi nánast tvöfaldast á árabilinu 2004-2010 hefur verðgildi krónunnar minnkað, aðföng hækkað í verði og aðstaða orðið dýrari. Allt þyngir þetta róður þeirra sem reka rannsóknarverkefni.
Enn eru blikur á lofti í íslensku efnahagslífi og framundan er sársaukafullur niðurskurður á flestum ef ekki öllum sviðum. Það er því mikilvægt að íslenskt vísindasamfélag taki höndum saman um að standa ekki bara vörð um öflugan Rannsóknasjóð heldur fylgi eftir tillögum um eflingu hans. Slíkt er enda í samræmi við ályktun Vísinda- og tækniráðs sem í stefnu sinni 2010-2012 hefur mælst til þess að hærra hlutfall af opinberum fjárveitingum til rannsókna og þróunar fari í gegnum samkeppnissjóði.
Í árferði sem því sem nú ríkir á Íslandi hafa auðvitað vaknað spurningar um hlutverk og eðli Rannsóknasjóðs – stærsta samkeppnissjóðs landsins. Lögum samkvæmt (nr. 3/2003) hefur sjóðurinn það hlutverk að styrkja vísindarannsóknir á Íslandi. Styrkir eru veittir samkvæmt almennum áherslum Vísinda- og tækniráðs að undangengnu faglegu mat á gæðum rannsóknarverkefna, færni þeirra einstaklinga sem stunda rannsóknirnar og aðstöðu þeirra til að sinna verkefninu. Þetta þýðir meðal annarra orða að Rannsóknasjóður er opinn samkeppnissjóður þar sem gæði verkefna ráða úrslitum um hvort styrkur er veittur. Stjórn sjóðsins er lögum samkvæmt bundin af hinu faglega mati. Matið fer fram í fagráðum Rannsóknasjóð en þau eru skipuð af vísindanefnd Vísinda- og tækniráðs. Fagráðin leita eftir áliti tveggja ytri sérfræðinga á hverja umsókn en hafa ber skýrt í huga að fagráð ber endanlega ábyrgð á mati og röðun einstakra umsókna (ytri sérfræðingar eru til ráðuneytis og mat þeirra er ekki endanlegt mat). Nöfn og staða fagráðsmanna eru opinber og þau má nálgast á heimasíðu RANNÍS.
Nokkra athygli hefur vakið að búið er að færa hefðbundinn umsóknarfrest fram til 1. júní (var áður 1. október). Það er gert vegna þess að stjórn Rannsóknasjóðs hefur ákveðið að allt ytra mat fari eftirleiðis fram erlendis enda skulu allar umsóknir og umsóknargögn vera á ensku (nema í undantekningartilvikum). Návígið í íslensku vísindasamfélagi er mikið og nauðsynlegt að treysta ytra matið með þessum hætti. Rannsóknasjóður hefur smám saman verið að færa ytra mat úr landi og almennt má segja að umsóknir íslenskra vísindamanna hafi komið vel út úr mati þegar þær hafa verið sendar erlendis. Það er gleðiefni og sýnir svo ekki verður um villst að gæði rannsókna sem stundaðar eru á Íslandi standast samanburð á alþjóðavettvangi.
Nýliðun í íslensku vísindasamfélagi er áhyggjuefni og skapa þarf ungum vísindamönnum tækifæri og aðstöðu til að hasla sér völl hér á landi. Stjórn Rannsóknasjóðs hefur í þessu augnamiði ákveðið að breyta reglum um rannsóknastöðustyrki. Þeir eru eftir sem áður ætlaðir þeim sem lokið hafa doktorsprófi á síðastliðnum 5 árum en nú hefur stjórnin ákveðið að viðurkenna fleiri kostnaðarliði í þessum styrkjum en einungis launakostnað. Það þýðir að nú eru rannsóknastöðustyrkir að fullu sambærilegir við verkefnastyrki Rannsóknasjóðs þegar kemur að viðurkenndum kostnaði.
Stjórn Rannsóknasjóðs hefur einnig ákveðið að gefa umsækjendum kost á að tilgreina sérstaklega á umsóknareyðublöðum ef um þverfaglega umsókn er að ræða. Í þeim tilvikum geta umsækjendur tilgreint fleiri en eitt fagráð eða jafnvel sleppt því alfarið. Formenn fagráða taka slíkar umsóknir til umræðu og ákveða hvar þær skulu metnar. Mat þeirra og röðun fer fram í einu af fjórum fagráða Rannsóknasjóðs þó svo að hugsanlega verði leitað álits þvert á fagráð.
Loks hefur stjórn Rannsóknasjóðs gert nokkrar smærri breytingar, s.s.:
- Rannsóknasjóður veitir ekki lengur forverkefnisstyrki.
- Kostnaður vegna kynningar á niðurstöðum verkefna er nú styrkhæfur í verkefnum og kynningarstyrkir falla því niður í verkefnum frá og með 2011. Verkefnisstjórar sem fengu styrki fram til 2010 geta áfram sótt um kynningarstyrk til að koma niðurstöðum á framfæri.
- Ráðstefnuferðir eru ekki styrktar á 1. verkefnisári heldur aðeins á 2. og 3. styrkári. Búið er að setja þak á slíkan kostnað.
- Meistaranemi getur nú fengið að hámarki 12 mánaða styrk úr sjóðnum jafnvel þó svo að verkefnistímabil sé lengra.
Umsækjendur eru beðnir að kynna sér Reglur og leiðbeiningar fyrir styrkárið 2011 áður en gengið er frá umsóknareyðublöðum og viðaukum (t.a.m. hvað varðar umsóknarfrest, styrkhæfi, styrkupphæð, lengdartakmarkanir (viðaukar) o.s.frv.). Ófullgerðum umsóknum og umsóknum þar sem farið er á svig við reglur sjóðsins verður vísað frá.
Prófessor Guðrún Nordal
Formaður stjórnar Rannsóknasjóðs
II. Stjórn Rannsóknasjóðs
Stjórn Rannsóknasjóðs er skipuð af mennta- og menningarmálaráðherra til þriggja ára í senn samkvæmt tilnefningu vísindanefndar Vísinda- og tækniráðs. Formaður vísindanefndar er jafnframt formaður stjórnar. Frá 2009 er stjórnin skipuð eftirtöldum einstaklingum:
| Aðalmenn | Varamenn |
| Dr. Guðrún Nordal, prófessor, Stofnun Árna Magnússonar í íslenskum fræðum | Dr. Unnur Dís Skaptadóttir, prófessor, Háskóla Íslands |
| Dr. Hannes Jónsson, prófessor, Háskóla Íslands | Dr. Magnús Már Halldórsson, prófessor, Háskólanum í Reykjavík |
| Dr. Áslaug Helgadóttir, prófessor, Landbúnaðarháskóla Íslands | Dr. Áslaug Geirsdóttir, prófessor, Háskóla Íslands |
| Dr. Þórunn Rafnar, deildarstjóri, Íslenskri erfðagreiningu | Dr. Einar Mäntyla, Orf líftækni |
| Dr. Vilmundur Guðnason, prófessor, Hjartavernd | Dr. Þorvaldur Ingvarsson, prófessor, Háskólanum á Akureyri |
Samkvæmt 8. grein laga nr. 3 frá 2003 um opinberan stuðning við vísindarannsóknir gefur stjórn sjóðsins út reglur um umsóknir, meðferð þeirra og úthlutun. Reglurnar fara hér á eftir ásamt leiðbeiningum um gerð umsókna og úthlutunarstefnu Rannsóknasjóðs sem samþykkt er af vísindanefnd Vísinda- og tækniráðs.
RANNÍS fer með daglega umsýslu Rannsóknasjóðs. Magnús Lyngdal Magnússon sviðsstjóri og ritari stjórnar Rannsóknasjóðs (magnus@rannis.is) svarar almennum fyrirspurnum varðandi sjóðinn en spurningum varðandi einstök fagráð má einnig beina til umsjónarmanna fagráða (sjá X. kafla).
Stjórnarfundir eru haldnir reglulega, yfirleitt fyrsta mánudag í hverjum mánuði nema í júní, júlí og ágúst. Formleg erindi þurfa að berast stjórninni a.m.k. viku fyrir auglýstan fund ef það á að taka þau fyrir á fundinum. Heimilisfangið er:
Rannsóknasjóður
Prófessor Guðrún Nordal, formaður stjórnar
c/o Magnús Lyngdal Magnússon
Laugavegi 13
101 Reykjavík
Vinsamlegast athugið að umsækjendur eiga ekki undir nokkrum kringumstæðum að hafa samband við stjórnarmenn eða fagráðsmenn meðan mat umsókna fer fram. Öllum fyrirspurnum og ábendingum skal beina til RANNÍS. Brot á þessu ákvæði getur leitt til þess að umsókn verði vísað frá.
Tölfræði Rannsóknasjóðs fyrir tímabilið 2004-2010 má nálgast á hér (einungis aðgengileg á íslensku).
III. Umsóknarfrestir og tegundir styrkja
Rannsóknasjóður veitir þrenns konar styrki með umsóknarfrest 1. júní 2010:
Að auki veitir Rannsóknasjóður einkaleyfastyrki og kynningarstyrki með umsóknarfresti 1. nóvember 2010, 1. apríl 2011 og 1. nóvember 2011. Hámark slíkra styrkja er 500.000 kr. Þessir styrkir eru einungis veittir til að kynna niðurstöður eða vegna umsókna um einkaleyfi úr verkefnum sem Rannsóknasjóður hefur styrkt fram til ársins 2010. Þriðja tegund smærri styrkja, alþjóðasóknarstyrkir (t.a.m. vegna umsókna í 7. RÁ), er fjármögnuð af Rannsóknasjóði (allt að 10 milljónir króna á ári) en alþjóðasvið RANNÍS fer með umsýslu þeirra. Hægt er að sækja um alþjóðasóknarstyrki hvenær sem er nema annað sé tilkynnt sérstaklega en hámark þeirra er 500.000 kr.
Sérstök umsóknareyðublöð eru fyrir hverja styrktegund auk viðauka (öndvegisstyrkir, verkefnastyrkir og rannsóknastöðustyrkir). Eyðublöðin er að finna hér.
IV. Styrkhæfi vegna umsókna um öndvegisstyrki, verkefnastyrki og rannsóknastöðustyrki
Hlutverk Rannsóknasjóðs er að styrkja vísindarannsóknir á Íslandi. Í þeim tilgangi styrkir sjóðurinn skilgreind rannsóknarverkefni einstaklinga, rannsóknarhópa, háskóla, rannsóknarstofnana og fyrirtækja (önnur grein laga nr. 3/2003 um opinberan stuðning við vísindarannsóknir).
Verkefnisstjórar skulu hafa lokið rannsóknarnámi við viðurkennda háskóla og hafa reynslu af rannsóknum. Sé sótt um styrk til rannsóknar sem er hluti af rannsóknarnámi skal verkefnisstjórn vera í höndum leiðbeinenda.
Sami einstaklingur getur sótt um fleiri en einn styrk sem verkefnisstjóri. Rannsóknasjóður veitir þó aldrei fleiri en einn styrk til sama verkefnis.
V. Öndvegisstyrkir
Öndvegisstyrkir eru ætlaðir til umfangsmikilla verkefna sem eru líkleg til að skila íslenskum rannsóknum í fremstu röð á alþjóðavettvangi. Verkefnisstjóri og aðrir helstu umsækjendur skulu hafa viðurkennda reynslu af rannsóknarvinnu og stjórnun stórra rannsóknarverkefna. Öndvegisverkefni skulu hafa skýr markmið og vel skilgreinda og varðaða verkefnisáætlun. Í umsókninni skal gera skýra grein fyrir væntingum um afrakstur og ávinning verkefnisins.
Eftirtalin atriði vega þungt þegar umsóknir um öndvegisstyrk eru metnar og er mikilvægt að gerð sé grein fyrir þeim í umsókn:
- Verkefnisstjórn skal vera í höndum vísindamanns með viðurkenndan vísindaferil, forystuhæfileika og reynslu af rekstri rannsóknarverkefna.
- Samstarf öflugs hóps vísindamanna.
- Framlag meistara- eða doktorsnema.
- Samstarf við erlenda rannsóknarhópa og vísindamenn.
- Mótframlag stofnana eða fyrirtækja þar sem rannsóknirnar fara fram.
Öndvegisstyrkir eru veittir í allt að 36 mánuði. Styrkupphæð getur að hámarki verið 75 milljónir króna fyrir 36 mánaða verkefni, 50 milljónir fyrir 24 mánaða verkefni og 25 milljónir fyrir 12 mánaða verkefni.
Styrkurinn úr Rannsóknasjóði nemur að hámarki 85% af heildarverkefniskostnaði að frádregnum kostnaði vegna samreksturs og aðstöðu. Athugið að samrekstur og aðstaða reiknast ekki sem mótframlag í verkefniskostnaði.
Öndvegisstyrkir geta verið mótframlag eða viðbótarfjármögnun á stórum verkefnum sem erlendir samkeppnissjóðir styrkja.
Áætlanir um hámarksstyrki úr Rannsóknasjóði byggjast á áætlunum um framlag í sjóðinn 2011. Stjórn sjóðsins áskilur sér rétt til að endurskoða reglur um hámarksstyrki verði breytingar á þessum áætlunum.
VI. Verkefnastyrkir
Verkefnastyrkir eru veittir í allt að 36 mánuði. Styrkupphæð getur að hámarki verið 20 milljónir króna fyrir 36 mánaða verkefni, 13 milljónir fyrir 24 mánaða verkefni og 6,5 milljónir fyrir 12 mánaða verkefni. Gert er ráð fyrir nokkuð jafnri dreifingu milli ára. Styrkurinn úr Rannsóknasjóði nemur að hámarki 85% af heildarverkefniskostnaði að frádregnum kostnaði vegna samreksturs og aðstöðu. Athugið að samrekstur og aðstaða reiknast ekki sem mótframlag í verkefniskostnaði.
Verkefni skulu hafa skýr markmið og vel skilgreinda og varðaða verkefnisáætlun. Gera verður grein fyrir þörf tilgreindrar styrkupphæðar, lýsa áætlaðri notkun styrksins og hverjir vinni hvern verkþátt. Krafist er ítarlegrar kostnaðaráætlunar þar sem gera skal skýra grein fyrir öllum verkþáttum, kostnaði þeirra og fjármögnun. Í umsókninni skal gera skýra grein fyrir væntingum um afrakstur og ávinning verkefnisins.
Áætlanir um hámarksstyrki úr Rannsóknasjóði byggjast á áætlunum um framlag í sjóðinn 2011. Stjórn sjóðsins áskilur sér rétt til að endurskoða reglur um hámarksstyrki verði breytingar á þessum áætlunum.
VII. Rannsóknastöðustyrkir
Rannsóknastöðustyrkir eru ætlaðir vísindamönnum sem hafa lokið doktorsprófi á síðastliðnum 5 árum og sækjast eftir tækifæri til að hasla sér völl í vísindum á Íslandi.
Rannsóknastöðustyrkir eru veittir í allt að 36 mánuði. Styrkupphæð getur að hámarki verið 20 milljónir króna fyrir 36 mánaða verkefni, 13 milljónir fyrir 24 mánaða verkefni og 6,5 milljónir fyrir 12 mánaða verkefni. Gert er ráð fyrir nokkuð jafnri dreifingu milli ára og hámarkslaun rannsóknastöðustyrkþega eru 4.440 þús. kr. á ári. Ekki er gerð krafa um mótframlag í rannsóknastöðustyrkjum. Athugið að samrekstur og aðstaða reiknast ekki sem mótframlag í verkefniskostnaði.
Rannsóknastöðustyrkþega sem hlaut styrk árið 2009 eða 2010 er heimilt að sækja um verkefnisstyrk á öðru og þriðja styrkári. Rannsóknasjóður greiðir þó ekki kostnað sem þegar fellur undir rannsóknastöðustyrkinn.
Umsækjandi um rannsóknastöðustyrk skal skila með umsókn sérstakri yfirlýsingu á þar til gerðu eyðublaði (Viðauki E) frá væntanlegum gestgjafa um framlag hans, hvað varðar laun, aðstöðu, réttindi og faglegt umhverfi, áætlað samstarf eða annað sem við á. Framlag gestgjafastofnunar er haft til hliðsjónar við mat á umsókn og yfirlýsing hennar verður hluti af samningi um styrkveitingu ef af verður. Yfirlýsing þessi skal vera undirrituð af ábyrgðarmanni gestgjafastofnunar.
Beiðni styrkþega um færslu milli stofnana skal berast stjórn Rannsóknasjóðs og er framhald styrks þá háð samþykki hennar.
Áætlanir um hámarksstyrki úr Rannsóknasjóði byggjast á áætlunum um framlag í sjóðinn 2011. Stjórn sjóðsins áskilur sér rétt til að endurskoða reglur um hámarksstyrki verði breytingar á þessum áætlunum.
VIII. Viðurkenndur kostnaður
a) Laun og launatengd gjöld
Umsækjendur skulu hafa til hliðsjónar almenna kjarasamninga og stofnanasamninga við útreikning launa. Launakostnaður miðast við útborguð laun að viðbættum beinum kostnaði af vinnu starfsmannsins, þ.m.t. launatengd gjöld. Ekki er hægt að nota útseldan taxta til viðmiðunar við útreikning launa. Eftirfarandi tafla sýnir hæsta launakostnað (þ.m.t. launatengd gjöld) og hámarksfjölda mánaða (pr. einstakling í verkefni) sem Rannsóknasjóður viðurkennir árið 2011:
| Starfsheiti | Hámarksupphæð | Hámarksfjöldi mánaða pr. einstakling |
| Sérfræðingur 1 (t.d. prófessor) | 530 þús. kr. | Allt að 36 mánuðir |
| Sérfræðingur 2 (t.d. lektor, dósent) | 425 þús. kr. | Allt að 36 mánuðir |
| Nýdoktor | 370 þús. kr. | Allt að 36 mánuðir |
| Doktorsnemi | 265 þús. kr. | Allt að 36 mánuðir |
| Rannsóknamaður | 265 þús. kr. | Allt að 36 mánuðir |
| Meistaranemi | 210 þús. kr. | Allt að 12 mánuðir |
Meistaranemi getur fengið að hámarki 12 mánaða styrk úr sjóðnum jafnvel þó svo að verkefnistímabil sé lengra.
Starfsmenn við rannsóknastörf sem háðir eru verkefnatekjum geta sótt um eigin laun til Rannsóknasjóðs.
Rannsóknasjóður greiðir hvorki yfirvinnu vegna rannsókna né laun til þeirra sem eru jafnframt á fullum launum í öðrum störfum.
b.1) Rekstrarkostnaður
Undir þennan lið skal færa samtölu allra nauðsynlegra aðfanga fyrir verkefnið, en þó ekki liði sem falla undir samrekstur og aðstöðu. Gera þarf grein fyrir öllum rekstrarkostnaði (Viðauki C). Óútskýrður rekstrarkostnaður verður skorinn.
b.2) Stofnkostnaður
Kostnað að hámarki 500 þúsund krónur vegna kaupa á tækjum og búnaði má færa sem rekstrarkostnað á hverju 12 mánaða tímabili. Umsóknum um dýrari tæki og búnað skal skila í Tækjasjóð. Umsóknarfrestur í Tækjasjóð er auglýstur með 6 vikna fyrirvara. Gera þarf grein fyrir öllum stofnkostnaði (Viðauki C). Óútskýrður stofnkostnaður verður skorinn.
c) Ferðakostnaður
Hér skal færa samtölu kostnaðar vegna ferða sem eru nauðsynlegar fyrir framgang verkefnisins. Í skýringum skal færa rök fyrir öllum ferðum og á hvern hátt þær tengjast verkefninu. Athugið að kostnaður vegna ráðstefnuferða er einungis styrkhæfur á 2. og 3. styrkári en ekki á 1. styrkári. Eftirfarandi tafla sýnir hámarkskostnað vegna ráðstefnuferða (pr. einstakling) sem Rannsóknasjóður viðurkennir árið 2011:
| Áfangastaður | Hámark pr. einstakling | Hámarksfjöldi ráðstefnuferða á ári |
| Evrópa | 200,000 | 1 |
| N-Ameríka (Bandaríkin/Kanada) | 250,000 | 1 |
| Asía | 250,000 | 1 |
Gera þarf grein fyrir öllum ferðakostnaði (Viðauki C). Óútskýrður ferðakostnaður verður skorinn.
d) Aðkeypt þjónusta
Undir þennan lið fellur vinna sem ekki er unnin af þátttakendum í verkefninu, en er nauðsynleg fyrir framgang þess. Gera þarf grein fyrir öllum kostnaði vegna aðkeyptrar þjónustu (Viðauki C). Óútskýrður kostnaður vegna aðkeyptrar þjónustu verður skorinn.
e) Kynning á niðurstöðum
Heimilt er að sækja um allt að 500 þúsund krónur á lokaári verkefnis til að standa straum af kostnaði við kynningu á niðurstöðum (t.a.m. útgáfukostnaður). Þennan kostnað skal færa sem rekstrarkostnað á lokaári verkefnis en tilgreina sem kostnað vegna kynningar á niðurstöðum. Gera þarf grein fyrir öllum kostnaði vegna kynningar á niðurstöðum (Viðauki C). Óútskýrður kostnaður vegna kynningar á niðurstöðum verður skorinn.
f) Samrekstur og aðstaða
Rannsóknasjóður styrkir ekki kostnað vegna samrekstrar og aðstöðu eða álag á laun umfram launatengd gjöld (sjá nánar úthlutunarstefnu sjóðsins). Ekki er heimilt að færa á verkefnið kostnað við samrekstur og aðstöðu sem mótframlag.
Stjórn Rannsóknasjóðs áskilur sér rétt til að endurskoða reglur um hámarksstyrki og til að kalla eftir nánari skýringum á kostnaði frá umsækjendum.
IX. Annað
Stjórn Rannsóknasjóðs getur á grundvelli mats á umsókninni ákveðið að styrkja aðeins hluta af skilgreindum verkþáttum í umsókn. Stjórnin getur leitað til annarra um fjármögnun á ákveðnum verkþáttum eða styrk til verkefnisins.
X. Matsferli nýrra umsókna
Fagráð, sem hvert er skipað sjö einstaklingum með víðtæka reynslu af rannsóknum, leggja faglegt mat á allar nýjar umsóknir um styrki úr Rannsóknasjóði og skila sjóðsstjórn umsögn um hverja umsókn fyrir sig (skipan fagráða má sjá hér). Vísindanefnd Vísinda- og tækniráðs skipar fagráð fyrir 2009-2011. Fagsviðin eru eftirfarandi:
| Fagráð | Umsjónarmaður (RANNÍS) |
| Verkfræði, tækni- og raunvísindi | Sigurður Björnsson (sigurdur@rannis.is) |
| Náttúru- og umhverfisvísindi | N.N. |
| Heilbrigðis- og lífvísindi | Lýður Skúli Erlendsson (lydur@rannis.is) |
| Félags- og hugvísindi | Guðný Hallgrímsdóttir (gudny@rannis.is) |
Undir þessi fjögur meginfagsvið falla margir fagflokkar vísinda og tækni. Í XIV. kafla ná nálgast lista yfir þessa fagflokka.
Að minnsta kosti tveir sérfræðingar utan fagráðs meta hverja umsókn. Fagráð kynna sér allar umsóknir og afgreiða hverja umsókn með rökstuddri, skriflegri greinargerð (umsögn) og forgangsraða umsóknum á grunni hins faglega mats.
Fagráð flokka umsóknir í fimm flokka:
| I. Afburða góðar umsóknir |
| II. Mjög góðar umsóknir |
| III. Góðar umsóknir |
| IV. Sæmilegar umsóknir |
| V. Umsóknir með alvarlega formgalla og umsóknir sem falla utan starfssviðs Rannsóknasjóðs |
- Áður en fagráð ganga frá umsögnum til stjórnar Rannsóknasjóðs ræða formenn þeirra á sameiginlegum fundi sérstök álitamál sem kunna að hafa komið upp.
- Til viðbótar hinu faglega mati, sem fagráð skila, skal stjórn Rannsóknasjóðs miða umfjöllun sína við úthlutunarstefnu Rannsóknasjóðs sem er samþykkt af vísindanefnd og almennar áherslur Vísinda- og tækniráðs.
- Áður en stjórn Rannsóknasjóðs gengur endanlega frá styrkveitingum ræðir hún úthlutunina á fundum með formönnum fagráða.
- Samkvæmt 4. grein laga nr. 3 frá 2003 sæta ákvarðanir stjórnar Rannsóknasjóðs um styrkveitingu eða höfnun ekki stjórnsýslukæru.
- Að loknu úthlutunarferli fá umsækjendur svar ásamt afriti af umsögn fagráðs.
XI. Greiðslur og eftirfylgni með styrktum verkefnum
Styrkir eru veittir til allt að þriggja ára með fyrirvara um fullnægjandi framvindu verkefna og framlög í sjóðinn. Rannsóknasjóður gerir fyrsta samning við styrkþega innan fjögurra mánaða frá úthlutun og framhald ræðst síðan af framvindu verkefnis.
Ársskýrslur
Fyrir 10. janúar hvers árs skal skila ársskýrslu um framvindu verksins á árinu á undan. Í henni ber að gera grein fyrir öllum mikilvægum breytingum á verkefni eða staðfesta að áætlun hafi verið fylgt. Einnig skal skila kostnaðaráætlun næsta styrkárs. Ársskýrslur eru metnar af starfsfólki Rannís sem gerir tillögu til stjórnar sjóðsins um framhaldsstyrkveitingu. Stjórn Rannsóknasjóðs og starfsfólk Rannís getur kallað eftir meiri upplýsingum frá styrkþegum þegar ársskýrslur eru metnar ef þörf er talin á. Ársskýrslur verða metnar af fagráðum telji starfsmenn Rannís eða stjórn Rannsóknasjóðs ástæðu til.
Fyrsta greiðsla hvers árs (40%) fylgir undirritun samnings, önnur greiðsla (40%) fer fram 1. september og lokagreiðsla (20%) hvers árs er greidd þegar ársskýrsla, þ.e. skýrslan um umrætt styrkár, hefur verið samþykkt. Þegar ársskýrsla hefur verið samþykkt er samningur næsta árs sendur verkefnisstjórum. Stjórn sjóðsins áskilur sér rétt til að semja um aðra greiðsludreifingu í sérstökum tilfellum (t.d. þegar um stór verkefni er að ræða). Styrkþegar geta einnig farið fram á aðra greiðsludreifingu.
Lokaskýrslur
Þegar verkefni er lokið skulu verkefnisstjórar skila lokaskýrslu. Í lokaskýrslu er gerð grein fyrir vinnu við verkefnið, afrakstri þess og niðurstöðum. Lokaskýrslur verða metnar af fagráðum og starfsmönnum Rannís. Lokagreiðsla (20% af síðasta ári) fer fram að loknu mati nema fram komi alvarlegar athugasemdir við skýrsluna. Mat á lokaskýrslu verður haft til hliðsjónar sæki verkefnisstjóri um styrk til nýrra verkefna úr sjóðnum.
XII. Umsóknir - almennar leiðbeiningar
Athugið að sótt er um hverja styrktegund á þar til gerðu umsóknareyðublaði. Umsóknareyðublöðin eru eftirfarandi (heiti skjala innan sviga):
Allar umsóknir og umsóknagögn skulu vera á ensku, svo að mögulegt sé að senda umsóknir í mat erlendis. Undanþágur eru veittar frá þessari meginreglu ef birtingar á viðkomandi fræðasviði einskorðast við íslenska útgáfu. Í þeim tilvikum skal umsækjandi fá leiðbeiningar hjá starfsmönnum RANNÍS.
- Umsókn ásamt fylgigögnum skal skila í tvennu lagi til Rannís:
Í einu eintaki (frumrit með undirskriftum) fyrir kl. 16:00 þriðjudaginn 1. júní 2010. Ef umsókn er póstlögð þarf póststimpill að vera 1. júní í síðasta lagi. Heimilisfang Rannís er: Laugavegur 13, 101 Reykjavík. Skrifa skal skýrt á umslag: „Umsókn í Rannsóknasjóð“. - Í öðru lagi skal senda umsókn og öll fylgigögn í rafrænu formi á tölvupóstfangið: umsoknir@rannis.is. Umsóknina og fylgiskjöl ber að vista undir nafni verkefnisstjóra (nafn_verkefnisstjóri.doc/xls/pdf) og í efnislínu (subject) tölvupóstsins skal setja: Rannsóknasjóður: Umsókn um styrk – nafn_verkefnisstjóra. Athugið að rafræn skil þurfa að eiga sér stað fyrir klukkan 16:00 þriðjudaginn 1. júní. Umsóknir sem berast síðar verða ekki teknar gildar (miðað er við tímaskráningu tölvupóstsins).
Ófullgerðum umsóknum verður vísað frá. Umsókn skulu fylgja eftirfarandi viðaukar á sérstökum eyðublöðum:
| Viðauki A: Verkefnislýsing |
| Viðauki B: Ferilskrá verkefnisstjóra og annarra umsækjenda |
| Viðauki C: Skýringar á öllum kostnaði |
| Viðauki D: Verðtilboð (sé sótt um styrk vegna kaupa á tækjum og búnaði til rannsókna) |
| Viðauki E: Yfirlýsing gestgjafastofnunar (rannsóknastöðustyrkur) |
Eyðublöð vegna viðauka A, B, C og E má nálgast hér. Umsækjendur sem nota LATEX eða sambærilegan hugbúnað hafa heimild til að útbúa eyðublöð fyrir viðauka A og B en lúta þá sömu reglum um lengd, stafagerð, stafabil o.s.frv. Umsóknum sem hlíta ekki þessum reglum verður vísað frá.
Athugið að engin önnur fylgigögn skulu fylgja umsókn.
Leiðbeiningar við umsóknareyðublöð
1. Verkefnisstjóri/umsækjandi: Nafn þess sem ber ábyrgð á umsókn og framkvæmd verkefnis. Beðið er um það póstfang sem Rannís og stjórn Rannsóknasjóðs notar í samskiptum við verkefnisstjóra.
2. Verkefni: Heiti verkefnis á íslensku og ensku skal ekki vera lengra en 150 slög. Skrifa skal heiti fagráðs. Fagflokkur skal vera í samræmi við meðfylgjandi lista yfir fagflokka fagráða, sem er aftast í þessum leiðbeiningabæklingi. Skrifa skal bæði númer og heiti fagflokks. Ef um er að ræða þverfaglega umsókn er ekki nauðsynlegt að tilgreina fagráð. Umsækjendur geta skilið reitinn eftir auðan eða tilgreint fleiri ein eitt fagráð. Formenn fagráða taka slíkar umsóknir til umræðu og ákveða hvar þær skulu metnar. Þetta ákvæði á einungis við um þverfaglegar umsóknir og mat þeirra og röðun fer fram í einu af fjórum fagráða Rannsóknasjóðs þó svo að hugsanlega verði leitað álits þvert á fagráð.
3. Rannsóknaraðstaða/gestgjafastofnun: Hér skal gefa upp póstfang og ábyrgðarmann þeirrar stofnunar sem rannsóknin fer fram á. Sé sótt um rannsóknastöðustyrk skal tilgreina hér gestgjafastofnun og ábyrgðarmann hennar.
4. Kostnaður og fjármögnun: Hér skal gefa upp þá upphæð (í þús. kr.) sem sótt er um til Rannsóknasjóðs og aðra fjármögnun á verkefninu. Mikilvægt er að allar upphæðir hér séu í samræmi við lið 11 (liður 10 í umsókn um rannsóknastöðustyrk).
5-6. Lýsing á verkefni í hnotskurn á íslensku og ensku: Hér skal lýsa verkefninu almennt á íslensku og ensku. Lýsa skal í stuttu máli markmiði, framkvæmd og gildi verkefnisins. Lýsingin er til opinberrar birtingar og skal vera hámark 1500 slög.
7. Aðrir umsækjendur: Hér skal geta allra umsækjenda, annarra en verkefnisstjóra, sem þiggja laun eða annað fáist styrkur, svo og þeirra sem leggja fram fjármagn, aðstöðu, tæki eða annað til verkefnisins. Athugið að meistara- eða doktorsnemar skulu skráðir í lið 8 (á ekki við um umsókn um rannsóknastöðustyrk).
8. Áætlun um meistara- eða doktorsverkefni: Hér skal geta þeirra meistara- og doktorsverkefna sem áætlað er að vinna í tengslum við verkefnið (liður 7 í umsókn um rannsóknastöðustyrk).
9. (liður 8 í umsókn um rannsóknastöðustyrk) Bókhaldsumsjón: Hér skal gefa upp hver fer með bókhald verkefnisins.
10. (liður 9 í umsókn um rannsóknastöðustyrk) Önnur verkefni sem verkefnisstjóri/umsækjandi tekur þátt í eða stýrir: Taki verkefnisstjóri/umsækjandi þátt í öðrum rannsóknaverkefnum (innlendum sem erlendum) skal geta þess hér sem og vinnuframlagi hans til verkefnanna á ári. Ekkert mælir gegn því að verkefnisstjóri/umsækjandi taki þátt í fleiri en einu verkefni.
11. (liður 10 í umsókn um rannsóknastöðustyrk) Kostnaðaryfirlit fyrir verkefnið í heild sinni: Umsækjendur eru beðnir um að fylla út tvær eða þrjár einfaldar kostnaðartöflur (A, B og C). Ef sótt er um Rannsóknastöðustyrk skal aðeins fylla út tvær töflur (A og B).
Mikilvægt er að samræmi sé á milli allra taflnanna og milli þeirra og liðar 4. Umsækjendur eru í lið 11A (10A í umsókn um rannsóknastöðustyrk) beðnir um að gera grein fyrir þeim hluta sem sótt er um til Rannsóknasjóðs, mótframlagi svo og heildarkostnaði verkefnisins. Sá hluti sem sótt er um til Rannsóknasjóðs má að öllu jöfnu ekki vera meiri en 85% af heildarkostnaði verkefnisins. Ef sótt er um rannsóknastöðustyrk er ekki gerð krafa um fjármögnun annars staðar frá.
Ítarlegar skýringar á öllum kostnaðar- og fjármögnunarliðum skulu fylgja umsókn á sérstöku eyðublaði (Viðauki C) sem má nálgast á heimasíðu RANNÍS.
Nánar er greint frá meðhöndlun kostnaðar í Úthlutunarstefnu fyrir Rannsóknasjóð (XIII. kafli).
A. Kostnaður og fjármögnun (tafla á umsóknareyðublaði): Hér skal gera grein fyrir öllum kostnaði við verkefnið öll árin, jafnt þeirri fjárhæð sem sótt er um til Rannsóknasjóðs sem mótframlagi (annarri fjármögnun). Liðurinn laun (laun og launatengd gjöld) sem sótt er um til sjóðsins þarf að vera í samræmi við töflu í lið B og mótframlag skal vera í samræmi við töflu í lið C.
B. Sundurliðun á launagreiðslum (tafla á umsóknareyðublaði): Hér skal geta þeirra sem áætlað er að þiggi laun í verkefninu, annarsvegar af styrkfé Rannsóknasjóðs og hinsvegar annars staðar frá. Þetta á við um alla sem eiga að þiggja laun, jafnt nema, aðstoðarmenn sem sérfræðinga. Upplýsingar skulu vera eins nákvæmar og hægt er. Sé óvíst hvaða einstaklingar eigi að þiggja laun (t.d. ef ekki er búið að finna rannsóknanema) skal þess einnig getið. Mikilvægt er að þessi tafla sé í samræmi við lið 8.
C. Sundurliðun á mótframlagi (tafla á umsóknareyðublaði): Hér skal gera grein fyrir mótframlagi, þ.e. allri annarri fjármögnun til verkefnisins en Rannsóknasjóðs. Um er að ræða styrki sem þegar er búið að fá vilyrði fyrir (efri hluti töflunnar), styrki sem verið er að sækja um eða sem stendur til að sækja um (neðri hluti töflunnar). Í töflunni skal koma fram framlag háskóla, stofnunar eða fyrirtækis til verkefnisins.
12. (liður 11 í umsókn um rannsóknastöðustyrk) Tillögur um matsmenn – beiðni um að tilteknir sérfræðingar komi ekki að mati á umsókn (valkvætt). Umsækjendur geta bent á sérfræðinga (utan Íslands) sem þeir telja að búi yfir sérþekkingu til að meta umsóknina. Umsækjendur geta einnig óskað eftir því að tilteknir sérfræðingar komi ekki að mati á umsókninni en tilgreina þarf ástæður fyrir slíkri beiðni. Viðkomandi fagráð tekur endanlega afstöðu til tillagnanna en slíkar ábendingar geta orðið til þess að auðveldara verði að tryggja að faglega sé staðið að vali á ytri matsmönnum. Fagráð eru ekki bundin af tillögum um ytri matsmenn.
13. (liður 12 í umsókn um rannsóknastöðustyrk) Fylgiskjöl: Nauðsynleg fylgiskjöl eru:
Viðauki A: Verkefnislýsing (sérstakt eyðublað)
Verkefnislýsing skal ekki vera lengri en 15 blaðsíður að viðbættri forsíðu, leiðbeiningarsíðu og heimildaskrá (1,5 línubil, 12 punkta Times/Times New Roman eða svipað). Frávik frá ákvæðum um hámarkslengd og uppsetningu leiða til þess að umsókn verður vísað frá. Í verkefnislýsingu skal gera grein fyrir eftirfarandi og skipta lýsingunni í eftirfarandi kafla:
a. Staða þekkingar og færni.
b. Markmið verkefnis og nýnæmi þess.
c. Rannsóknaraðferðir, verk- og tímaáætlun.
d. Samstarf í verkefninu (innlent/erlent).
e. Framlag doktors- og meistaranema í verkefninu.
f. Ávinningur og væntanlegur afrakstur.
g. Áætluð birting niðurstaðna.
Umsækjendur gera þá sjálfsögðu kröfu að aðilar sem meta umsóknina faglega hafi sérþekkingu á þeirri vísindagrein sem umsóknin fellur undir. Á móti kemur að ein helsta forsenda fyrir vönduðu faglegu mati er að verkefninu sé nógu ítarlega lýst til að framkvæma megi matið út frá þeim upplýsingum sem koma fram í umsókninni. Vönduð verkefnislýsing auðveldar faglegt mat á umsókninni. Hafa skal eftirfarandri atriði í huga:
- Mikilvægt er að verkefnið hafi vel skilgreind markmið og því sé deilt upp í vel skilgreinda verkþætti.
- Lýsa skal hverjum þætti fyrir sig, skýra innbyrðis tengsl þeirra eftir því sem við á og áætla nauðsynlegan tíma fyrir hvern verkþátt.
- Lýsa skal helstu vörðum í verk- og tímaáætlun sem marka skil á milli áfanga í verkefninu. Þegar um er að ræða verkefni, þar sem sótt er um stuðning til tveggja eða þriggja ára, skal skilgreina og lýsa vörðum í lok fyrsta, annars og þriðja styrkárs.
- Gera verður grein fyrir þeim rannsóknaraðferðum sem notaðar eru og af hverju þær eru notaðar í hverju tilfelli. Aðferðafræði við söfnun upplýsinga (og umfang hennar) og mat á gögnum þarf að liggja fyrir.
- Gera skal grein fyrir samstarfi innan verkefnis, bæði milli ólíkra vísindamanna, rannsóknamanna og hvort um virkt samstarf milli háskóla, stofnana og fyrirtækja sé að ræða. Lýsa skal sérstaklega alþjóðlegu samstarfi í verkefninu.
- Upplýsingar um hvaða hlutar verkefnis eru doktors- eða meistaraverkefni, ef við á, og við hvaða skóla (og deild) nemarnir leggja stund á námið og í hverju framlag nema er fólgið í verkefninu.
- Gera skal grein fyrir og færa rök fyrir áætluðum ávinningi af nýtingu niðurstaðna verkefnisins. Ávinningur getur verið þekkingarlegur, umhverfislegur, hagrænn, félagslegur o.s.frv. Afrakstur verkefna eru mælanlegar „einingar" sem út úr verkefninu koma. Dæmi um afrakstur eru: birtar vísindagreinar, ritverk, háskólagráður, hugbúnaður, gagnagrunnar, frumgerðir, framleiðsluaðferðir, ný framleiðsluefni, einkaleyfi, líkön, rannsóknaaðferðir, staðfestar vísindakenningar o.fl.
- Einnig skal gera grein fyrir hvernig staðið verður að kynningu niðurstaðna og birtingu þeirra í fagritum, skýrslum, ráðstefnum, o.s.frv., og hvort og þá hvernig eignarréttur niðurstaðna verður verndaður.
Rannsóknasjóður bendir umsækjendum á að afla tilskilinna leyfa Persónuverndar, Vísindasiðanefndar og/eða Tilraunadýranefndar þar sem það á við.
Viðauki B: Ferilskrár (sérstakt eyðublað)
Ferilskrá verkefnisstjóra og annarra umsækjenda skal ekki vera lengri en tvær til fjórar blaðsíður. Í ferilskrá skal koma fram náms- og starfsferill ásamt ritaskrá síðustu 5-10 ára.
Viðauki C: Skýringar á öllum kostnaði (sérstakt eyðublað)
Gera skal ítarlega grein fyrir öllum kostnaði og fjármögnun verkefnisins. Greinargerðin skal vera í samræmi við lið 11 (liður 10 í umsókn um rannsóknastöðustyrk) í umsókn. Sé talin ástæða getur sjóðurinn kallað eftir ársreikningum stofnunar eða fyrirtækis. Gera skal skýra grein fyrir öllum verkþáttum, kostnaði þeirra og fjármögnun.
Viðauki D. Verðtilboð (sé sótt um styrk vegna kaupa á rannsóknatækjum)
Sé sótt um styrk vegna tækjakaupa, er nauðsynlegt að skila verðtilboði frá framleiðanda með umsókn.
Viðauki E: Yfirlýsing gestgjafastofnunar (aðeins með umsókn um rannsóknastöðustyrk)
Umsókn um rannsóknastöðustyrk skal fylgja yfirlýsing frá ábyrgðarmanni gestgjafastofnunar á þar til gerðu eyðublaði (Viðauki E). Í yfirlýsingunni skal gera grein fyrir framlagi gestgjafastofnunarinnar, hvað varðar laun, aðstöðu, réttindi og faglegt umhverfi, áætlað samstarf eða annað sem við á. Framlag gestgjafans er haft til hliðsjónar við mat á umsókn og yfirlýsing hans verður hluti af samningi um styrkveitingu ef af verður. Yfirlýsing þessi skal vera undirrituð af ábyrgðarmanni gestgjafastofnunar.
14. (liður 13 í umsókn um rannsóknastöðustyrk) Undirskriftir: Hér skulu verkefnisstjóri/umsækjandi og allir aðrir umsækjendur skrifa undir ásamt ábyrgðarmanni rannsóknaraðstöðu eða gestgjafastofnunar. Með undirskrift sinni staðfestir verkefnisstjóri/umsækjandi að allar upplýsingar í umsókninni og fylgiskjölum séu réttar og að ekkert sé skilið undan sem skiptir máli. Með undirskrift sinni staðfesta aðrir þátttöku sína og þeirra háskóla, stofnana eða fyrirtækja sem þeir eru ábyrgir fyrir í fullu samræmi við umsókn og fylgiskjöl, þ.m.t. fjármögnun verkefnisins.
XIII. Úthlutunarstefna fyrir Rannsóknasjóð
Samþykkt í vísindanefnd Vísinda- og tækniráðs í apríl 2010 til birtingar í heild sinni með úthlutunarreglum sjóðsins.
Rannsóknasjóður styrkir grunnrannsóknir og hagnýtar rannsóknir og gerir skýrar kröfur um vísindalegan framgang, birtingu og skil á vísindalegum niðurstöðum. Mælikvarðar eru einkum birting niðurstaða og líkur á skráningu einkaleyfa eða hugverkaréttinda. Rannsóknaverkefni skulu styrkt eftir gæðum sem metin eru út frá vísindalegu gildi, færni og aðstöðu umsækjenda og líkum á birtingu niðurstaðna, gildi og nýtingu þeirra fyrir íslenskt samfélag. Með þessu á að tryggja að sambærileg viðmið gildi við mat á umsóknum um styrki, hvort sem um er að ræða grunnrannsóknir eða hagnýtar rannsóknir. Að teknu tilliti til faglegra gæða er áhersla á hugsanlega verðmætasköpun og menningarlega og samfélagslega nýsköpun.
Hlutverk vísindanefndar varðandi úthlutunarstefnu Rannsóknasjóðs kemur fram í 8. gr. laga nr. 3/2003 um opinberan stuðning við vísindarannsóknir. Þar segir:
„Vísindanefnd Vísinda- og tækniráðs markar úthlutunarstefnu Rannsóknasjóðs og Tækjasjóðs. Stjórn Rannsóknasjóðs gefur út reglur um umsóknir, meðferð þeirra og úthlutun eigi síðar en sex vikum fyrir lok umsóknarfrests. Þar skulu koma fram skilyrði umsókna og áherslur Vísinda- og tækniráðs.“
Stefna Vísinda- og tækniráðs 2010-2012
Rannsóknasjóður er eitt öflugasta tæki hins opinbera til að efla innviði rannsóknasamfélagsins með styrkjum til rannsóknaverkefna á grundvelli umsókna. Í stefnu ráðsins 2010-2012 segir svo um samkeppnissjóðina almennt: „Samkeppnissjóðir sem byggjast á vönduðu gæðamati umsókna og nánu samstarfi á milli háskóla, rannsóknastofnana og fyrirtækja, eru forsenda fyrir öflugu rannsókna- og nýsköpunarstarfi. ... Samkeppnissjóðir þurfa að vinna nánar saman að ákveðnum verkefnum. Markmið með fjárveitingum úr samkeppnissjóðum er að auka verðmætasköpun, efla menningu og stuðla að betra samfélagi.“
Í stefnu sinni leggur Vísinda- og tækniráð jafnframt til að:
- Opinberir sjóðir taki upp sambærileg viðmið við mat á kostnaði verkefna og taki mið af raunhæfum heildarkostnaði vegna rannsókna og þróunar.
- Opinber framlög til vísinda og nýsköpunar taki mið af gæðum og árangri og að gagnsæi og faglegt mat gildi við úthlutanir úr samkeppnissjóðum.
- Við mat á styrkumsóknum úr samkeppnissjóðum verði tekið tillit til hlutverka sjóðanna og kerfisins í heild.
- Rannsóknasjóður leggi sérstaka áherslu á stuðning við ungt vísindafólk með veglegum styrkjum, þannig að það geti byggt upp og þróað rannsóknir á Íslandi.
- Gerðar verði kröfur um að niðurstöður rannsókna sem njóta opinberra styrkja verði birtar í opnum aðgangi og mótuð verði opinber stefna þar að lútandi.
Rannsóknasjóður veitir styrki samkvæmt ákvæðum laga og stefnu Vísinda- og tækniráðs. Vísindanefnd leggur áherslu á að við mat á umsóknum vegi eftirfarandi atriði þungt:
- Rannsóknaverkefni skuli styrkt eftir gæðum sem metin eru eftir vísindalegu gildi, færni og aðstöðu umsækjenda og líkum á að verkefnið skili mælanlegum árangri og ávinningi.
- Verkefni sem uppfylla gæðaviðmið og unnin eru í virku, faglegu og fjárhagslegu samstarfi fyrirtækja, háskóla og stofnana, njóti, að öðru jöfnu, forgangs að styrkjum úr samkeppnissjóðum.
- Niðurstöður sem kostaðar eru með styrkjum úr Rannsóknasjóði skulu birtar í opnum aðgangi og vera öllum tiltækar nema um annað sé samið.
- Úthlutun styrkja úr sjóðnum taki mið af viðurkenndum heildarkostnaði verkefnis.
- Sjóðurinn taki tillit til aðstæðna umsækjenda, hvort sem þeir starfa sjálfstætt eða innan háskóla, stofnana eða fyrirtækja.
- Hugað verði að nýliðun í hópi vísindamanna og að sjóðurinn leggi sérstaka áherslu á stuðning við ungt vísindafólk.
- Hugað verði sérstaklega að fyrirkomulagi á mati á þverfaglegum umsóknum.
XIV. Fagsvið og fagflokkar fagráða Rannsóknasjóðs
| FAGRÁÐ: VERKFRÆÐI, TÆKNIVÍSINDI OG RAUNVÍSINDI | ||
| VÍSINDA- OG TÆKNISVIÐ | AÐALFLOKKUR | |
| 1 VERKFRÆÐI OG TÆKNI | 10 | Verkfræði og tækni, almennt |
| 11 | Byggingaverkfræði (bygginga- og mannvirkjatækni) | |
| 12 | Vélaverkfræði (véla- og málmtækni) | |
| 13 | Rafmagnsverkfræði (raf-, rafeinda- og fjarskiptatækni og sjálfvirkni) | |
| 14 | Efnaverkfræði (framleiðslu- og ferlistækni, ekki matvælatækni) | |
| 15 | Matvælaverkfræði (matvælatækni) | |
| 16 | Fiskiðnaðarfræði | |
| 17 | Iðnaðar-, kerfis- og rekstrarverkfræði (stjórnun, stýring, bestun) | |
| 18 | Landmælingar og arkitektúr | |
| 19 | Upplýsingatækni | |
| 2 STÆRÐFRÆÐI, TÖLVUVÍSINDI | 20 | Stærðfræði, tölvuvísindi almennt |
| 21 | Stærðfræði, reiknifræði | |
| 22 | Kerfisfræði, tölvunarfræði | |
| 3 EÐLISFRÆÐI OG EFNAFRÆÐI | 30 | Eðlisfræði og efnafræði almennt |
| 31 | Eðlisfræði | |
| 32 | Efnafræði | |
| 33 | Stjörnufræði, háloftafræði | |
| FAGRÁÐ: NÁTTÚRUVÍSINDI OG UMHVERFISVÍSINDI | ||
| VÍSINDA- OG TÆKNISVIÐ | AÐALFLOKKUR | |
| 4 UMHVERFIS- OG JARÐVÍSINDI | 40 | Umhverfis- og jarðvísindi almennt |
| 41 | Landafræði, landmótun | |
| 42 | Jarðfræði | |
| 43 | Jarðefnafræði | |
| 44 | Jarðeðlisfræði | |
| 45 | Veðurfræði, háloftafræði | |
| 46 | Haffræði | |
| 47 | Vatna- og grunnvatnsfræði | |
| 48 | Jarðvegsvísindi | |
| 49 | Umhverfisvísindi | |
| 5 NÁTTÚRU- OG LÍFFRÆÐI | 50 | Náttúru- og líffræði, almennt |
| 51 | Líffræði | |
| 52 | Grasafræði | |
| 53 | Gerlafræði | |
| 54 | Dýrafræði | |
| 55 | Vistfræði | |
| 56 | Lífefnafræði, lífeðlisfræði | |
| 57 | Vatna- og sjávarlíffræði | |
| 6 FISKVEIÐA- OG LANDBÚNAÐARVÍSINDI | 60 | Fiskveiða- og landbúnaðarvísindi, almennt |
| 61 | Jarðrækt | |
| 62 | Búfjárrækt | |
| 63 | Skógrækt | |
| 64 | Garðyrkja | |
| 65 | Fiskveiðar | |
| 66 | Fiskeldi | |
| 69 | Matvælarannsóknir | |
| FAGRÁÐ: HEILBRIGÐISVÍSINDI OG LÍFVÍSINDI | ||
| VÍSINDA- OG TÆKNISVIÐ | AÐALFLOKKUR | |
| 7 LÆKNISFRÆÐI | 70 | Læknisfræði, almennt |
| 71 | Líffærafræði | |
| 72 | Lífeðlisfræði og lífefnafræði | |
| 73 | Örverufræði og ónæmisfræði | |
| 74 | Meinafræði | |
| 75 | Lyfjafræði og eiturefnafræði | |
| 76 | Klínisk læknisfræði | |
| 77 | Tannlækningar | |
| 78 | Hjúkrun og sjúkraþjálfun | |
| 79 | Líftækni | |
| 67 | Dýralækningar | |
| FAGRÁÐ: FÉLAGSVÍSINDI OG HUGVÍSINDI | ||
| VÍSINDA- OG TÆKNISVIÐ | AÐALFLOKKUR | |
| 8 FÉLAGSVÍSINDI | 80 | Félagsvísindi, almennt |
| 81 | Landafræði, mannfræði, þjóðfræði | |
| 82 | Félags- og stjórnmálafræði | |
| 83 | Upplýsingafræði | |
| 84 | Hag- og viðskiptafræði | |
| 85 | Lögfræði | |
| 86 | Uppeldis- og sálarfræði | |
| 9 HUGVÍSINDI | 90 | Hugvísindi, almennt |
| 91 | Heimspeki | |
| 92 | Bókmenntafræði | |
| 93 | Málvísindi | |
| 94 | Sagnfræði | |
| 95 | Fornleifafræði | |
| 96 | Guðfræði | |
| 97 | Listfræði |
Leit
English
Samskipti
Rannsóknamiðstöð Íslands - Rannís • Laugavegi 13 • 101 Reykjavík • Sími 515 5800 • Fax 552 9814 • kt. 531094-2129 • rannis@rannis.is
