Tækniþróunarsjóður

Veflæg orðmyndabók er vefkerfi til viðhalds og umsýslu íslenskra orðmynda.
Verkefnisstjóri var Hjálmar Gíslason.

Heiti verkefnis: Veflæg orðmyndabók
Verkefnisstjóri: Hjálmar Gíslason, hjalli@spurl.net
Þátttakendur: Spurl ehf. og Orðabók Háskólans

VERKEFNIÐ VAR STUTT AF TÆKNIÞRÓUNARSJÓÐI.

Spurl ehf. og Orðabók Háskólans hafa lokið samstarfsverkefninu Veflæg orðmyndabók, sem styrkt var af Tækniþróunarsjóði. Veflæg orðmyndabók er vefkerfi til viðhalds og umsýslu íslenskra orðmynda, en orðmyndum íslenskra orða hafði áður verið safnað af Orðabók Háskólans í svokallaða Beygingarlýsingu íslensks nútímamáls, verkefni sem upphaflega var styrkt af Tungutæknisjóði menntamálaráðuneytisins.

Ávinningurinn af Veflægri orðmyndabók er einkum tvíþættur. Annars vegar margfaldar hið nýja kerfi notkunarmöguleika þessara málfræðigagna, þar sem kerfið opnar á ýmiskonar úrvinnslu gagnanna sem áður hefði verið mjög tímafrek eða jafnvel ómöguleg. Má þar nefna sjálfvirka orðtöku úr rituðum texta, greiningu samsettra orða og nýyrða og fleira. Hins vegar nýtist afraksturinn Spurl ehf. í leitartækni sinni, sem í dag knýr meðal annars leit á simaskra.is / já.is og á leitarvélinni Emblu á mbl.is.

Hið nýja kerfi mun einnig koma að gagni við ýmiskonar tungutækniverkefni, einkum á Vefnum, þar sem nú er unnt að veita rauntímaaðgang að þessum málfræðigögnum á Netinu og samtvinna þau inn í önnur kerfi. Sem dæmi um vekefni þar sem slíkt gæti nýst er við textaleiðréttingu, vélrænar þýðingar og í sjálfvirkri textavinnslu ýmiskonar.

Innkeyrsla gagna í Veflæga orðmyndabók stendur nú yfir og er stefnt að því að ljúka þeirri vinnu í júlímánuði.

Um Spurl

Spurl ehf. er leitarfyrirtæki sem hefur sérhæft sig í íslenskri textaleit. Leitartækni fyrirtækisins er m.a. í notkun á simaskra.is / já.is, á vefleitarvélinni Emblu á mbl.is og á vefsvæðum ýmissa fyrirtækja og stofnana. Fyrirtækið Já, sem gefur út símaskrána, rekur 118 og vefsvæðið simaskra.is keypti Spurl ehf. í maímánuði og tekur yfir rekstur þess frá og með 1. júlí.