Vísindakaffi 2011

Almenningi er boðið í Vísindakaffi í aðdraganda Vísindavöku, þar sem fræðimenn munu kynna viðfangsefni sín. Markmiðið með Vísindakaffikvöldunum er að færa vísindin nær fólki og kynna það rannsóknastarf sem stundað er í landinu á aðgengilegan hátt.

Vísindakaffin verða haldin á Súfistanum í Máli og menningu Laugavegi, 19., 20., 21. og 22. september kl. 20:00-21:30 hvert kvöld. Þar munu vísindamenn á ýmsum fræðasviðum kynna rannsóknir sínar sem allar eiga það sameiginlegt að vera áhugaverðar fyrir fólk á öllum aldri. Gestir fá tækifæri til að spyrja og taka þátt í umræðum og komast þannig að því hvernig störf vísindamanna hafa áhrif á daglegt líf okkar allra. Stjórnandi Vísindakaffikvöldanna er Davíð Þór Jónsson.

Í ár verður einnig boðið upp á Vísindakaffi á Akureyri, fimmtudaginn 22. sept., sjá neðar á síðunni.

Dagskrá á Súfistanum í Reykjavík:

Mánudagur 19. september

Að fæðast - hættulegasta ferðalagið?
Dr. Brynjar Karlsson, dósent við Tækni- og verkfræðideild Háskólans í Reykjavík
Burðarmálsdauði á Íslandi er með því allra lægsta sem gerist í heiminum. Hins vegar er burðarmálsdauði álíka mikill og fjöldi dauðsfalla í umferðinni á hverju ári og þar af leiðandi gríðarlega stórt heilbrigðisvandamál. Dr. Brynjar Karlsson, dósent við Tækni- og verkfræðideild Háskólans í Reykjavík mun velta upp hverjar eru helstu orsakir burðarmálsdauða og segja frá rannsóknum sem miða að því að búa til tækni sem gerir kleift að meta betur ástand fósturs og einnig til að meta betur hættu á fyrirburafæðingum. Sjá frétt RÚV frá 12. september um þessa nýju tækni.

Þriðjudagur 20. september 

Kuldinn síðasta sumar afsannar hlýnun jarðar!...er það ekki? ´
Dr. Halldór Björnsson, verkefnastjóri hjá Veðurstofu Íslands
Vísindamenn halda því fram að aukin gróðurhúsaáhrif valdi því að yfirborð jarðar sé að hlýna. Samt var síðasta sumar kalt. Gengur þetta upp?
Dr. Halldór Björnsson frá Veðurstofu Íslands ræðir gróðurhúsaáhrif og loftslagsbreytingar, kal í túnum og hafís.

Miðvikudagur 21. september

Sagnfræðingar eru frá Mars, valdhafar frá Venus. Af hverju getum við ekki verið sammála um söguna?
Guðni Th. Jóhannesson, sagnfræðingur
Þekking á liðinni tíð er til margra hluta nytsamleg, eða svo segja að minnsta kosti margir. Dr. Guðni Th. Jóhannesson sagnfræðingur fjallar um nýtingu sögunnar á Íslandi, allt frá landnámi til okkar daga. Ari fróði sagðist vilja hafa það sem sannara reynist en var það nú satt? Fyrir hvern skrifaði hann? Á hinn bóginn má líka spyrja hvers vegna sagnfræðingar samtímans ættu að nöldra svona um stórmenni sögunnnar. Skilja þeir ekki að sagan á að sameina okkur, gera okkur stolt af afrekum forfeðranna? Segjum að sagnfræðingar séu frá Mars og valdhafar frá Venus. Er þá nokkuð hægt að mætast á miðri leið? Í hvaða tómarúmi yrði það eiginlega?

Fimmtudagur 22. september

Offita barna - hvað er til ráða?
Prófessor Ragnar Bjarnason yfirlæknir Barnalækninga og Dr. Þrúður Gunnarsdóttir sálfræðingur á Barnaspítala Hringsins munu fjalla um rannsóknir á algengi og meðferð offitu hjá börnum og unglingum.

Dagskrá Vísindakaffisins á Akureyri:

Í ár verður einnig boðið upp á Vísindakaffi á Akureyri sem hér segir:

Fimmtudagur 22. september kl. 20-22 á 1862 Nordic Bistro í Hofi menningarhúsi
Norðausturland – vannýtt náttúruvætti?
Jón Þorvaldur Heiðarsson við Háskólann á Akureyri og Sigþrúður Stella Jóhannsdóttir við Náttúrustofu Austurlands velta fyrir sér hvernig náttúruperlur á Norðausturlandi gætu nýst okkur sem auðlindir án þess að tapa perluskini sínu.