Vísindamenn

Hér eru nánari upplýsingar um vísindamennina sem taka þátt í vísindakaffi Rannís

 

Dr. Clarence E. Glad, guðfræðingur og heimspekingur, er einn fremsti sérfræðingur Íslendinga á sviði nýjatestamentisfræða. Hann hefur tekið þátt í margvíslegu alþjóðlegu vísindasamstarfi og hafa rannsóknir hans verið styrktar af innlendum og erlendum rannsóknarsjóðum. Clarence hefur kennt bæði grísku og nýjatestamentisfræði við Kaupmannahafnarháskóla, Brownháskóla og Háskóla Íslands. Hann er nú sjálfstætt starfandi fræðimaður við ReykjavíkurAkademíuna 

Dr. Guðrún Pétursdóttir er dósent við Hjúkrunarfræðideild H.Í. og framkvæmdastjóri Stofnunar Sæmundar fróða um sjálfbæra þróun og þverfræðilegar rannsóknir. Hún lauk BA námi í sálarfræði við HÍ, meistaraprófi í lífeðlisfræði við Oxford háskóla og doktorsprófi í taugalífeðlisfræði frá Háskólanum í Osló. Undanfarin 15 ár hefur hún stýrt þverfræðilegum rannsóknarstofnunum við H.Í. og fjölbreyttum rannsóknarverkefnum á þeirra vegum.   

 

 

Dr. Berglind Guðmundsdóttir sálfræðingur starfar við Sálfræðiþjónustu/Áfallamiðstöð LSH.  Helstu störf hennar fela í sér meðferðarvinnu með þolendum áfalla, rannsóknir og kennslu. Berglind lauk BA námi í sálfræði við HÍ, meistaraprófi og doktorsprófi í klínískri sálfræði við Ríkisháskólann í Buffalo í New York ríki, Bandaríkunum, þar sem hún sérhæfði sig í afleiðingum áfalla.  Helstu rannsóknarverkefni Berglindar um þessar mundir eru rannsóknir á áhrifum jarðskjálftans 29. maí 2008 á íbúa á Suðurlandi og rannsóknir á afleiðingum kynferðislegs ofbeldis.  

 

 

Ragnhildur Guðmundsdóttir er doktorsnemi við Miðstöð í lýðheilsuvísindum við Háskóla Íslands og rannsakar langtímaheilsufarsafleiðingar náttúruhamfara. Hún lauk B.Ed. prófi frá Kennaraháskóla Íslands og lýkur M.Sc. prófi í klínískri sálfræði, tölfræði og aðferðafræði frá Universiteit Leiden í Hollandi nú í ár, ásamt sérnámi í hugrænni atferlismeðferð á vegum Félags um hugræna atferlismeðferð og Oxford Cognitive Therapy Centre. Hún tók hluta af námi sínu og starfsþjálfun við Universität Basel í Sviss og hefur unnið við sálfræðimeðferð, rannsóknir og kennslu. 

 

 

Edda Björk Þórðardóttir er framhaldsnemi við Miðstöð í lýðheilsuvísindum við Háskóla Íslands. Hún lauk B.A. gráðu í sálarfræði frá Háskóla Íslands þar sem hún rannsakaði langtímaeinkenni áfallastreituröskunar hjá þolendum snjóflóðsins í Súðavík.

 

 

 

Herdís Sigurjónsdóttir er bæjarfulltrúi í Mosfellsbæ og fyrrum verkefnisstjóri neyðarvarna og neyðaraðstoðar hjá Rauða krossinum. Hún er lífeindafræðingur og stundar nú meistaranám í umhverfis- og auðlindafræðum við H.Í., þar sem hún rannsakar stjórnsýslu og viðbrögð við náttúruhamförum. 

Alyson Bailes er gestakennari við stjórnmálafræðideild Háskóla Íslands og fyrrverandi forstöðumaður Friðarrannsóknarstofnunarinnar í Stokkhólmi (SIPRI). Alyson situr einnig í stjórn Alþjóðamálastofnunar HÍ. 

Silja Bára Ómarsdóttir er aðjúnkt í stjórnmálafræði við Háskóla Íslands og forstöðumaður Alþjóðamálastofnunar HÍ. Sérsvið hennar eru kenningar í alþjóðasamskiptum, samningatækni, femínismi og umhverfismál.

Sigríður Sigurjónsdóttir, prófessor í vöruhönnun við Listaháskóla Íslands stundaði rannsóknarvinnu í tengslum við tækninýjungar og persónulegt rými við Central Saint Martins í London. Samhliða náminu hóf hún störf hjá Central Saint Martins Design Lab við að rannsaka framtíðarmöguleika fyrir Intel og þróaði fyrir þá framtíðarvasann. Árið 1999 hóf Sigríður störf í Amsterdam, þar starfaði hún með hópi hönnuða, mannfræðinga og tæknimanna við að aðlaga stafrænt sjónvarpskerfi Microsoft að hollenskri menningu. Á sama tíma kenndi hún við Rietvelt Akademiuna. Árin 2001 – 2003 starfaði Sigríður í London fyrir fyrirtækið Red Fig sem hugmyndasmiður og viðmótshönnuður. Helstu viðskiptavinir fyrirtækisins voru BBC, Channel Four, British Telecom og Granada. Árið 2006 var Sigríður ráðin prófessor í vöruhönnun við Listaháskóla Íslands og vinnur hún samhliða að eigin hönnunarverkefnum.

 

Brynhildur Pálsdóttir útskrifaðist sem vöruhönnuður frá Listaháskóla Íslands vorið 2004 og með annað BA próf í vöruhönnun frá Design Lab Gerrit Rietveld Akademíunnar í Amsterdam sumarið 2005.Hún hefur starfað sem hönnuður að ýmsum verkefnum sjálfstætt og í samstarfi við Guðfinnu Mjöll Magnúsdóttur vöruhönnuð, en í sameiningu reka þær hönnunarfyrirtækið BORÐIÐ. Þær hafa einnig í skipulagt og kennt áfangann Stefnumót hönnuða og bænda við vöruhönnunardeild Listháskólans í samstarfi við Sigríði Sigurjónsdóttur. Brynhildur starfar einnig sem matarhönnuður hjá Matís ohf. þar sem unnið er að ýmsum verkefnum tengdum matarferðamennsku.  

Guðmundur H. Gunnarsson lífefnafræðingur er deildarstjóri hjá Matís ohf. Hann hefur unnið í starsfstöð fyrirtækisins á Höfn frá 2006. Guðmundur hefur unnið að margvíslegum rannsóknar- og þróunarverkefnum sem tengjast matvælaiðnaði á Íslandi. Hann hefur leitt uppbyggingu á Matvælasmiðju Matís á Höfn sem hugsuð er til að hvetja til smáframleiðslu nýrra matvæla á landsvísu.

Irek Klonowski, landbúnaðarverkfræðingur hjá Matís