Um 100 milljónum króna úthlutað úr Menntaáætlun Evrópusambandsins til yfirfærsluverkefna á sviði starfsmenntunar
Háskólinn á Bifröst með verkefnið RETRAIN:
RETRAIN er nafn á tveggja ára evrópsku verkefni um eflingu starfsþjálfunar í verslunum sem Rannsóknasetur verslunarinnar stýrir. Markmið þess er að koma á fót námi fyrir starfsþjálfa í verslunum. Þannig er stefnt að því að til verði sérhæfðir starfsmenn í verslunum sem geti tekið að sér þjálfun og verklega kennslu nýrra starfsmanna.
Beitt verður viðurkenndum aðferðum sem hafa reynst vel í öðrum starfsgreinum og í öðrum Evrópulöndum. Segja má að þetta sé liður í að koma á eins konar meistarakerfi í verslunum líkt og þekkist í mörgum iðngreinum. Verkefnið er liður í að bæta fagmennsku í verslunarstörfum og um leið hvatningu til þeirra sem starfa í verslun að sækja sér áframhaldandi menntunar, því margir þeirra sem starfa við almenn verslunarstörf hafa ekki lokið formlegri framhaldsmenntun.
Erlendir þátttakendur í verkefninu eru frá Austurríki og TESCO verslunarkeðjan á Írlandi. Námið sem verður þróað verður prófað í verslunarkeðjum í hverju þátttökulandanna. Hér verður það gert í Samkaupum, á Írlandi í TESCO verslunarkeðjunni og í Austurríki í verslunarkeðjunni Merkur. Auk Rannsóknaseturs verslunarinnar tekur Fræðslumiðstöð atvinnulífsins þátt í verkefninu hér á landi.
STARFSAFL með verkefnið NORDGREEN EQF:
Markmið verkefnisins er að:
Endurskoða og yfirfæra þekkingu sem er fólgin í fyrri vinnu nokkurra samstarfsaðila verkefnisins í námskrá í skrúðgarðyrkjufögum sem byggist á EQF rammanum sem kenna má bæði í formlega og óformlega skólakerfinu.
Þróa sjálfbærar lausnir sem taka mið af hnattrænum breyting og sem kenna má skrúðgarðyrkju
Semja stutta kennslubók um efnið ætlaða til kennslu í skrúðgarðyrkju, bæði í formlega og óformlega skólakerfinu
Starfsafl fræðslusjóður stýrir verkefninu og erlendir samstarfsaðilar eru Gjennestad Vidaregaaende skola í Noregi, Hvilan Utbildning í Svíþjóð, Samtök skrúðgarðyrkjumeistara í Noregi (Norske anleggsgartnere), Samtök skrúðgarðyrkjumeistara í Svíþjóð (Sveriges traedgaardsanlaeggnings forbund), Jens Thejsen a/s ráðgjöf í Danmörku og Samtök skrúðgarðyrkjumeistara í Finnlandi (Viheraluerakentajat ry).
Vinnumálastofnun með verkefnið FEMALE:
Verkefnið snýst um að auka færni og hæfni frumkvöðlakvenna sem nýlega hafa stofnað fyrirtæki. Markmið verkefnisins er að auka hæfni og færni þessa hóps og gera þær hæfari til að reka sín fyrirtæki og skapa fleiri störf.
Sett verður upp fræðsla fyrir frumkvöðlakonur sem fléttar saman námsþætti eins og stefnumótun, fjármál, skatta- og bókhald, vöruþróun, markaðsmál, útflutning og samfélagsmiðla við sjálfseflingu og markmiðasetningu.
Aðferðin hefur verið notuð í Bretlandi með góðum árangri en mun nú verða yfirfærð til Íslands, Spánar og Litháen. Útkoma verkefnisins verður námskeið fyrir frumkvöðlakonur (6 námsþættir) en á milli námsþátta verður ýmis fræðsla í boði sem tengist sjálfseflingu og markmiðasetningu. Hluti af verkefninu er gerð hagnýtrar handbókar og þróun vefumhverfis fyrir konur til að víkka tengslanet sitt og deila reynslu með öðrum frumkvöðlakonum í Evrópu.
Vinnumálastofnun stýrir verkefninu en samstarfsaðilar eru ráðgjafafyrirtækið Inova í Bretlandi, ATAEM félag fyrir konur í atvinnurekstri, avinnuþróunarfélagið KRIC í Litháen, netlausna og netnámsfyrirtækið VITECO á Ítaliu og Viðskipaháskólinn á Bifröst.
