Hvatningar­verðlaun Vísinda- og tækniráðs

Hvatningarverðlaun Vísinda- og tækniráðs eru veitt vísindamanni sem snemma á ferlinum þykir hafa skarað framúr og skapi væntingar um framlag í vísindastarfi er treysti stoðir mannlífs á Íslandi.

Hvatningarverðlun Vísinda- og tækniráðs verða næst afhent á Rannsóknarþingi sem haldið verður vorið 2017.

Verðlaunin hafa verið veitt frá árinu 1987, en þau voru veitt í fyrsta sinn á 50 ára afmæli atvinnu­deildar Háskóla Íslands. Mark­miðið með veitingu Hvatningar­verðlaunanna er að hvetja vísinda­menn til dáða og vekja athygli almenn­ings á gildi rannsókna og starfi vísinda­manna. Árlega er auglýst eftir tilnefningum til verðlaunanna, sem eru afhent við hátíðlega athöfn á Rannsókna­þingi Rannís.    

Fyrri handhafar Hvatningarverðlaunanna

Dómnefnd

Dómnefnd Hvatningarverðlaunanna er skipuð fyrri handhöfum verðlaunanna. Dómnefndina 2015 skipuðu þau Áslaug Helgadóttir aðstoðarrektor rannsókna hjá Landbúnaðarháskóla Íslands, Jón Gunnar Bernburg, prófessor við félagsvísindssvið HÍ, Valur Ingimundarson prófessor í sagnfræði við HÍ, Hörður G. Kristinsson, rannsóknastjóri hjá Matís og Kristján Leósson framkvæmdastjóri efnis-, líf- og orkutækni hjá Nýsköpunarmiðstöð Íslands.

Tilnefningar til Hvatningarverðlauna Vísinda- og tækniráðs

Tilnefningar geta komið frá öllum sviðum vísinda, tækni og fræða. Tilnefna má vísindafólk sem starfar á Íslandi við háskóla, rannsóknastofnanir, fyrirtæki eða er sjálfstætt starfandi. Öllum, sem eru í aðstöðu til að meta störf einstakra vísindamanna, er heimilt að senda tilnefningar. Ferilskrá vísindamansins skal fylgja tilnefningu.  

Við mat á tilnefningum er tekið tillit til námsferils viðkomandi vísindamanns, sjálfstæðis, frumleika og árangurs í vísindastörfum að loknu námi; ritsmíða, einkaleyfa og alþjóðasamstarfs, svo og annarra vísbendinga um líklegan árangur af störfum viðkomandi. Sérstaklega er litið til brautryðjendastarfs í vísindum. Þá er litið til faglegs framlags á vinnustað og miðlun þekkingar til íslensks samfélags. Fimm handhafar verðlaunanna skipa dómnefnd.

Almennt er miðað við að þeir sem koma til álita séu ekki eldri en 40 ára en þó er tekið fullt tillit til tafa sem kunna að verða á ferli vísindamannsins vegna ummönnunar barna.








Þetta vefsvæði byggir á Eplica