Jafnréttissjóður Íslands

Hvert er markmiðið?

Til­gangur Jafnréttissjóðs Íslands er að fjármagna eða styrkja verkefni og rannsóknir sem miða að því að stuðla að jafnrétti kynjanna í íslensku samfélagi og á alþjóðavísu.

Jafnréttissjóður Íslands nýtur framlaga af fjárlögum. Úthlutað var úr sjóðnum 18. júní 2021.

Tilgreint er í fjármálaáætlun hvaða ár úthlutun eigi að fara fram á hverju fimm ára tímabili en gert er ráð fyrir úthlutun á tveggja ára fresti. 

Næst verður úthlutað úr sjóðnum 19. júní 2023

Hverjir geta sótt um?

Einstaklingar, fyrirtæki, stofnanir og félagasamtök.

Hvernig er sótt um?

Umsóknum í sjóðinn skal skila inn í gegnum rafrænt umsóknarkerfi Rannís. Umsóknum má skila á íslensku og ensku. 

Skilyrði úthlutunar:

Sjóðurinn starfar samkvæmt reglum um úthlutun styrkja úr Jafnréttissjóði Íslands nr. 144/2021

Við mat á styrkhæfi umsókna verður lagt mat á gæði verkefnis- eða rannsóknaráætlunar, þ.m.t. markmið og skipulag verkefnis, hagnýtingargildi og mikilvægi þess með tilliti til reglna og markmiða sjóðsins um að auka jafnrétti kynjanna. Í samræmi við þingsályktanir um Jafnréttissjóð Íslands leggur stjórn áherslu á að styrkja verkefni og rannsóknir sem;

• eru til þess fallin að vinna gegn launamun kynjanna og efla almennt jafnrétti kynjanna á vinnumarkaði og í atvinnulífinu
• varpa ljósi á samfélagslegan, umhverfislegan og efnahagslegan ávinning af jafnrétti
• er ætlað að vinna gegn kynbundinni og kynferðislegri áreitni, kynbundnu ofbeldi og ofbeldi í nánum samböndum
• stuðla að fræðslu og forvörnum með það að markmiði að útrýma kynbundinni og kynferðislegri áreitni og kynbundnu ofbeldi í íslensku samfélagi
• stuðla að fræðslu og forvarnastarfi fyrir ungt fólk um ofbeldi, áreitni og einelti og orðræðu sem ýtir undir slíkt
• stuðla að fræðslu fyrir ungt fólk um ábyrga afstöðu til kynlífs, kláms og kynbundins ofbeldis
• stuðla að aukinni þekkingu á vörnum og samræmdum viðbrögðum við ofbeldi í nánum samböndum
• falla undir þróunarverkefni í skólakerfinu sem er ætlað að stuðla að sterkri og jákvæðri sjálfsmynd pilta og stúlkna, svo sem með aukinni fræðslu í kynjafræðum
• eru til þess fallin að hvetja ungt fólk af báðum kynjum til aukinnar þátttöku í samfélagslegum verkefnum og stjórnmálastarfi og stuðla að aukinni kosningaþátttöku þess
• eru til þess fallin að varpa ljósi á stöðu kynjanna jafnt í samtíð sem fortíð

Yfirlit yfir styrkveitingar

Skrifstofa jafnréttismála í forsætisráðuneytinu hefur tekið saman meðfylgjandi yfirlit yfir styrkveitingar Jafnréttissjóðs Íslands árin 2016-2020.

• Samantekt á styrkveitingum Jafnréttissjóðs Íslands 2016-2020.pdf (stjornarradid.is)