Fagráð

Vísindanefnd Vísinda- og tækniráðs skipar fagráð Rannsóknasjóðs. Hvert fagráð er skipað allt að sjö einstaklingum með dósentshæfi og víðtæka reynslu af rannsóknum. Að minnsta kosti tveir fagráðsmenn í hverju fagráði skulu vera starfandi utan Íslands. Við skipun fagráða er gætt að faglegri breidd og að því að kynjahlutfall sé sem jafnast.

Vísindanefnd skipar formann fagráðs úr röðum fagráðsmanna. Formaður ber ábyrgð á, með hjálp umsjónarmanns fagráðs, að samræma vinnu fagráðsins og að fagráðið vinni samkvæmt stefnu og hlutverki Rannsóknasjóðs og almennum siðareglum. Eftir að fagráðin hafa verið skipuð eru nöfn fagráðsmanna birt hér á síðunni.

Nánari leiðbeiningar til fagráðsfólks, ytri sérfræðinga, vanhæfisreglur og matsferli er að finna í Handbók Rannsóknasjóðs.

Fagráð og fagsvið

Sjö fagráð munu fjalla um umsóknir styrkársins. Sjö virkir vísindamenn skipa hvert fagráð og eru þeir valdir vegna sérfræðiþekkingar á viðkomandi sviði. Umsækjendur velja fagráð sem þeir vilja að umsóknir séu metnar í. Sérfræðingar Rannsóknasjóðs, í samráði við formenn fagráða, geta flutt umsóknir á milli fagráða séu efnisleg rök fyrir því. Frekari upplýsingar um vinnu fagráða má finna í leiðbeiningum til fagráðsmanna.

Spurningum varðandi einstök fagráð og fagsvið skal beint til starfsfólks Rannís. Umsækjendur mega ekki undir neinum kringumstæðum hafa samband við fagráðsmenn meðan á matsferli stendur.

Fagráðsfólk