Auglýst er eftir umsóknum um starfslaun listamanna sem úthlutað er árið 2019 í samræmi við ákvæði laga nr. 57/2009. Umsóknarfrestur er til miðnættis 1. október 2018 en þá er aðgangi lokað. Umsóknir teljast ekki gildar fyrr en búið er að staðfesta þær í síðasta lið umsóknar í umsóknarkerfinu og senda þær inn. Umsækjendur fá svar í janúar.
Skrifa má umsókn á ensku.
Hafi umsækjandi hlotið starfslaun áður, verður umsókn aðeins tekin til umfjöllunar að framvinduskýrslu vegna fyrri starfslauna hafi verið skilað til stjórnar listamannalauna, sbr. ákvæði 4. gr. laga um listamannalaun nr. 57/2009.
Hámarkslengd starfslauna er 24 mánuðir
Ekki er lengur hægt að sækja um listamannalaun til 36 mánaða. Stjórn sjóðsins telur eðlilegra að listamaður sæki aftur um laun ef ekki hefur náðst að ljúka verkefninu á meðan á launatímabili stóð.
Sýnileiki listamannalauna
Launþegar sjóðsins eiga að geta þess við birtingu umsóknaverka sinna að þeir hafi notið listamannalauna. Með auknum sýnileika sjóðsins eflist vitund almennings um mikilvægi listamannalauna.
Ferðastyrkjum verður ekki úthlutað
Stjórn listamannalauna hefur ákveðið að úthluta ekki ferðastyrkjum í ár með það fyrir augum að efla nýliðun. Hægt er að fella verkefni sem krefjast ferðalaga inn í almennar umsóknir til sjóðsins.
Nýliðun
Stjórn listamannalauna hefur það að markmiði að 5% af mánaðarfjölda hvers sjóðs sé úthlutað til einstaklinga sem aldrei hafa hlotið laun úr sjóðnum áður.
Fylgigögn með umsóknum
Aðeins verður tekið við rafrænum gögnum – hámarksstærð skráa er 25 mb og hámarksfjöldi skráa er 5. Ekki er hægt að hlaða inn zip skrám. Hægt að setja tengla á vefsíður í sérstakan reit í umsókn.
Launasjóður sviðslistafólks og styrkir til atvinnuleikhópa
Stjórn sjóðsins samþykkti tillögu leiklistarráðs um að gefa kost á því að umsóknir til leiklistarráðs (frá atvinnuleikhópum) geti jafnframt nýst sem umsóknir til listamannalauna, launasjóðs sviðslistafólks. Eftir sem áður verða sér umsóknarnúmer fyrir báðar tegundir umsókna og öll umsýsla verður aðskilin.
Atvinnuleikhópur sem hyggst sækja um styrk til atvinnuleikhóps og listamannalaun gerir það í gegnum umsóknarform atvinnuleikhópa.
Sviðslistahópur sem hyggst einungis sækja um listamannalaun, sækir um flokkinn skilgreint samstarf.
Verkefni sem liggja til grundvallar umsókn
Ferill listamanns
Verk- og tímaáætlun
