Leiðbeiningar vegna umsókna

Umsóknarfrestir og umsóknarkerfi Rannís

Umsóknarfrestur er tvisvar á ári, í maí og nóvember og er sótt um í gegnum umsóknarkerfi Rannís (sjá leiðbeiningar).

Næsti umsóknarfrestur verður 15. nóvember kl. 16:00, vegna verkefna sem efnt verður til á tímabilinu 1. janúar – 30. júní 2018.  Styrkir eru að jafnaði ekki veittir lengur en til eins árs í senn.


Almennt um umsóknina

  • Í umsóknareyðublaðinu skal gera greinargóða lýsingu á aðstandendum verksins, verkinu sjálfu og kostnaðaráætlun fyrir verkið (sjá leiðbeiningar hér fyrir neðan). Ef um einstakling er að ræða þá fylgi upplýsingar um starfsferil, faglegan og listrænan bakgrunn hans.
  • Ef umsækjandi hefur áður verið veittur styrkur úr Tónlistarsjóði þarf lokaskýrsla fyrir veittan styrk að hafa borist Rannís. Undantekningar frá þessu er að ef umræddur styrkur var veittur í síðustu úthlutun sjóðsins eða að sérstaklega hafi verið samið um seinkun á skil á lokaskýrslu við Rannís.
  • Umsókn skal fyllt út og skilað í umsóknarkerfi Rannís (sjá leiðbeiningar).
  • Umsóknir og fylgigögn sem berast eftir að umsóknarfrestur er liðinn eru ógildar og ekki teknar til umfjöllunar í sjóðnum. 
  • Sýniseintak af umsókn

Hvað er styrkt og hvað ekki?

  • Tónlistarsjóður styrkir ýmis verkefni á sviði tónlistar og tónleikahalds, bæði í höfuðborginni og á landsbyggðinni. Til dæmis eru veittir styrkir til stakra einstaklingsverkefna, samstarfsverkefna og fastrar starfsemi viðurkenndra tónlistarhópa, tónlistarhátíða og tónleikahalds af ýmsum toga.
  • Mikilvægt er að vandað sé til umsókna og að þeim fylgi skýr og ítarleg lýsing verkefnis og ferilsskrár þátttakenda. Sé sótt um styrk til tónleikahalds þarf að fylgja umsókninni efnisskrá tónleika og staðfestir tónleikastaðir/dagsetningar tónleika. Sé sótt um styrk til tónlistarhátíðar eða tónleikaraðar þurfa sömuleiðis að liggja fyrir drög að heildardagskrá og efnisskrám einstakra tónleika, með nöfnum þátttakenda.
  • Tónlistarsjóður styrkir almenna tónlistarstarfsemi skv 1. gr laga um tónlistarsjóð og kynningar og markaðsstarf tónlistar og  tónlistarmanna hér á landi og erlendis.
  • Tónlistarsjóður styrkir almennt ekki verkefni sem teljast til tónsköpunar. Fyrir viðameiri verkefni er hægt að sækja um styrki úr Tónskáldasjóði RÚV auk þess sem tónskáld geta sótt um Starfslaun listamanna sem úthlutað er árlega. Tónskáldasjóður Rásar 2 og Tónskáldasjóður 365 styðja einnig sköpun á nýrri íslenskri tónlist.
  • Tónlistarsjóður styrkir almennt ekki hljóðritanir á nýrri, frumsamdri tónlist. Umsækjendum er bent á Hljóðritasjóð sem úthlutað er úr tvisvar á ári, sem og Hljóðritasjóð STEFs. Tónlistarsjóður styrkir aftur á móti hljóðritanir á eldri tónlist sem fellur ekki undir svið Hljóðritasjóðs.
  • Tónlistarsjóður styrkir almennt ekki tónleikaferðir hljómsveita, hljóðfærahópa eða einleikara til útlanda. Umsækjendum er bent á Útflutningssjóð íslenskrar tónlistar.
  • Tónlistarsjóður styrkir almennt ekki útgáfu tónlistar á nótum. Umsækjendum er bent á Nótnasjóð STEFs.
  • Tónlistarsjóður styrkir almennt ekki heimasíðugerð eða tölvusetningu nótna.
  • Tónlistarsjóður styrkir almennt ekki bókaútgáfu. Umsækjendum er bent á Miðstöð íslenskra bókmennta.
  • Tónlistarsjóður styrkir almennt ekki verkefni á vegum lista- og menningarstofnana sem þegar njóta fastra framlaga ríkis og borgar, t.d. Sinfóníuhljómsveitar Íslands, Íslensku óperunnar, o.s.frv.
  • Tónlistarsjóður veitir ekki styrki til tónlistarnáms.

Þeim sem hyggjast sækja um styrk til tónleikahalds í Hörpu er bent á að Ýlir og Styrktarsjóður Samtaka um tónlistarhús og Ruthar Hermanns veita styrki til tónleikahalds í Hörpu.

Leiðbeiningar við gerð kostnaðaráætlunar 

Mikilvægt er að hafa í huga að við gerð fjárhagsáætlunar í eyðublaði að átt er við heildarkostnað verksins. Tilgreina þarf fjármögnun á móti styrknum sem sótt er um til Tónlistarsjóðs. Ef sótt er um styrk eða framlög til annarra sjóða en Tónlistarsjóðs fyrir verkinu skal tilgreina það í umsókn, jafnvel þó niðurstaða úr þeim umsóknum liggi ekki fyrir.










Þetta vefsvæði byggir á Eplica