Island Harvest, vatna- og sjávarsláttuvélin Asco - verkefni lokið
Fréttatilkynning verkefnisstjóra
Með vatna- og sjávarsláttuvélinni Asco er þangið slegið en ekki slitið upp með rótum. Það hefur því möguleika á að vaxa á ný.
Asco Harvester ehf. framleiðir sjávarsláttuvél (e. aquatic
weed harvester) sem slær margar tegundir af þangi og öðrum sjávargróðri á
sjálfbæran hátt. Sjálfbærnin er falin í því að þangið er slegið, en ekki slitið
upp með rótum og neðsti hluti plöntunnar skilinn eftir. Þangið hefur því
möguleika á því að vaxa aftur svipað nýslegnu grasi, ólíkt því sem myndi gerast
ef rætur þess yrðu slitnar upp. Asco er auk þess hreinsunarprammi sem er
útbúinn til að hreinsa upp rusl úr sjónum. Flestir hafa heyrt um
umhverfisvandamál eins og í Plasthafinu (e. The Plastic ocean) ásamt því að
rusl berst að ströndum landa vegna náttúruhamfara. Einnig er aukið vandamál með
sjávargrös sem vaxa út frá mengun frá verksmiðjum og landbúnaði víða erlendis.
Þennan gróður er hægt að fjarlægja með vélum Asco. Asco Recycle virkar þannig
að hann safnar saman rusli eða öðrum gróðri á yfirborði sjávar, ásamt því að ná
1,9 m niður fyrir sjávarmál. Ruslið fer svo á færiband og þaðan í stóra sekki
sem losaðir eru í ból þegar þeir fyllast.
Heiti verkefnis:
Island Harvest, vatna- og sjávarsláttuvélin Asco
Verkefnisstjóri: Anna Ólöf Kristjánsdóttir, Asco Harvester ehf.
Tegund styrks: Frumherjastyrkur
Styrkár: 2015
Fjárhæð styrks: 7 millj. kr.
Tilvísunarnúmer Rannís: 153552-061
VERKEFNIÐ VAR STYRKT AF TÆKNIÞRÓUNARSJÓÐI.
Markmið Asco Harvester ehf. og stefna Asco er að bæta og
þróa fyrirliggjandi tækni sem notast er við í dag. Það hefst með því að
kortleggja þá hnökra sem á öðrum vélum eru og hafa það til hliðsjónar með nýrri
og endurbættri hönnun. Sú rannsóknar- og þróunarvinna sem þegar hefur átt sér
stað hefur gefið hagnýtar niðurstöður. Þær fást með því fyrst og fremst að
nútímavæða drifbúnað, sláttuaðferð, vélbúnað, glussakerfi, vinnuöryggi, lægri
viðhaldskostnaði og fleira.
Í byrjun næsta árs er áætlað að frumgerð Asco Viking, Sigri 9057, verði sjósettur í Stykkishólmi. Þetta ár hefur verið unnið að smíði hans og er óhætt að segja að hún hafi gengið vonum framar. Það verður því áhugavert að byrja þróun í sjó og við slátt. Frumgerð Asco er þannig hönnuð og smíðuð að hann er hægt að nota til þróunar á öðrum tegundum og búnaði. Er það von Asco að sú tækni og þróun sem hér er að verða til, nýtist við slátt á afurð sem áður er ónýtt ásamt því að auka vinnuöryggi, nýtingu og sjálfbærni.
