Markaðssókn Tulipop í Bretlandi - verkefnislok
Fréttatilkynning verkefnisstjóra
Á árinu 2014 var íslenska hönnunarfyrirtækinu Tulipop úthlutað markaðsstyrk frá Tækniþróunarsjóði til að ráðast í öfluga markaðssókn á Bretlandsmarkaði. Markmið fyrirtækisins var að ná fótfestu á breskum markaði, byggja upp þétt net söluaðila og auka þannig útflutningstekjur og verðmæti vörumerkisins.
Heiti verkefnis: Markaðssókn Tulipop í Bretlandi
Verkefnisstjóri: Helga Árnadóttir, Tulipop ehf.
Tegund styrks: Markaðsstyrkur
Styrkár: 2014
Fjárhæð styrks: 10 millj. kr.
Tilvísunarnúmer Rannís: 142342-061
VERKEFNIÐ VAR STYRKT AF TÆKNIÞRÓUNARSJÓÐI.
Stuðningur Tækniþróunarsjóðs gerði Tulipop kleift að ráðast í fjölbreytt markaðsverkefni á breskum markaði. Fyrirtækið tók þátt í þremur virtum vörusýningum á árinu, auk þess að taka þátt í svokallaðri „pop-up” verslun í hópi virtra barnavörumerkja. Samhliða því stundaði Tulipop samfellt sölu- og markaðsstarf í gegnum síma, tölvupóst og rafræn fréttabréf, auk þess sem breskar verslanir voru heimsóttar reglulega, og vörur fyrirtækisins voru markvisst kynntar fyrir breskum fjölmiðlum, bæði prent- og netmiðlum.
Verkefnið hefur leitt til umtalsverðrar veltuaukningar Tulipop á breskum markaði, en vörur Tulipop eru nú seldar í 23 verslunum í Bretlandi. Vörur Tulipop hafa jafnframt fengið mjög jákvæða fjölmiðlaumfjöllun í Bretlandi, en umfjöllun um vörur fyrirtækisins hefur meðan annars birst í dagblaðinu Daily Mail, í tímaritinu Toy News og í tímaritunum Mother & Baby og Prima Baby sem eru mjög mikið lesin. Tulipop varð einnig þess heiðurs aðnjótandi að fá þrjár viðurkenningar fyrir vörur sínar frá hinum virtu Junior Design Awards í lok ársins 2014, en Tulipop er að því best er vitað fyrsta íslenska vörumerkið til að fá slíkar viðurkenningar.
Árangur Tulipop á breskum markaði hefur einnig opnað tækifæri á öðrum mörkuðum, en í gegnum breskar vörusýningar hefur Tulipop selt vörur sínar til fleiri landa og náð samningum við samstarfsaðila á öðrum mörkuðum, s.s. við umboðsmann í Frakklandi og fyrirtæki á sviði nytjaleyfasamninga í Bandaríkjunum (e. licensing agreements).
