Þróun mannvirkja úr trefjagleri og steinull – verkefni lokið
Fréttatilkynning verkefnisstjóra
Eðli hugmyndarinnar um mannvirki úr trefjagleri/plasti og steinull er bylting á hefðbundnum byggingaraðferðum.
Andri Þór Gunnarsson, Haraldur Ingvarsson, Helga
Hinriksdóttir og Regin Grímsson tóku þátt í Nýsköpunarkeppni sjónvarpsins
Toppstöðin haustið 2015 en í lokaþætti keppninnar hlaut hugmynd Regins
Grímssonar um nýja gerð lokaðra byggingareininga úr trefjastyrktu plasti með
kjarna úr steinull flest atkvæði þjóðarinnar. Síðan þá hefur teymið unnið
þrotlaust að þróun hugmyndarinnar og rannsóknum. Eðli hugmyndarinnar um
mannvirki úr trefjagleri/plasti og steinull er bylting á hefðbundnum
byggingaraðferðum og hefur þróunarvinnan leitt okkur langt frá fyrstu frumgerð
sem byggð var til prófunar hjá Nýsköpunarmiðstöð Íslands árið 2017. Helsta
breytingin varðar trefjaplastið sjálft en í upphafi var notað samskonar
trefjaplast og notað er í bátasmíði en það er eldfimt og brennur með dökkum
reyk. Eftir mikla leit og prófanir bæði innanlands sem og erlendis fannst efni
sem þróað var fyrir lestarvagna og uppfyllir brunakröfur, efnið er eldtefjandi
og reykir ekki ásamt því að uppfylla staðal A2-s2,d0. Þetta efni hefur enga
takmörkun á notkun í byggingariðnaði samkvæmt Evrópuskilgreiningu. Fibra hefur
fengið einkaleyfi á framleiðsluaðferð sinni á Fibra-húseiningum á Íslandi og er
með einkaleyfisumsóknir í umsóknarferli í Evrópu og Bandaríkjunum. Tækniþróunarsjóður
veitti Fibra ehf. verkefnisstyrk vorið 2016 og Vöxt ári síðar. Af þeim fjölmörgu
sem veitt hafa fyrirtækinu ómetanlega hjálp og hvatningu er á engan hallað
þegar sagt er að án aðkomu Tækniþróunarsjóðs og dyggum stuðningi Lýðs S.
Erlendssonar sérfræðings og Sigurðar Björnssonar sviðsstjóra Rannsóknar- og
Nýsköpunarsviðs hefði þetta verkefni aldrei orðið að veruleika og eru þeim hér
með færðar kærar þakkir fyrir ómetanlegan stuðning og leiðsögn.
Heiti verkefnis: Þróun
mannvirkja úr trefjagleri og steinull
Verkefnisstjóri: Regin Eysturoy Grímsson
Styrkþegi: Fibra ehf.
Tegund styrks: Vöxtur
Fjöldi styrkára: 2
Fjárhæð styrks: 50 millj. kr. alls
VERKEFNIÐ VAR STYRKT AF TÆKNIÞRÓUNARSJÓÐI.
