Landeldi á Evrópuhumri - verkefnislok
Fréttatilkynning verkefnisstjóra
Ný tækni hefur verið að ryðja sér til rúms í landeldi og þekking verið að aukast á því sviði.
Tilraunaeldi á Evrópuhumri (Homarus gammarus) hefur nú staðið yfir í eitt og hálft ár hérlendis. Evrópuhumar er eitt dýrasta sjávarfang sem fyrirfinnst, humarstofnar eru víða á niðurleið en eftirspurnin á mörkuðum eykst stöðugt. Á sama tíma hefur ný tækni verið að ryðja sér til rúms í landeldi og þekking verið að aukast á því sviði. Það eru því nýir möguleikar á að koma upp landeldi á Evrópuhumri sem ekki hafa verið mögulegir áður. Humarinn var fluttur inn frá National Lobster Hatchery í Padstow á Englandi og frá Hafrannsóknastofnuninni í Noregi. Verkefnið sem unnið er að hérlendis gengur út á að ala humarinn til manneldis. Humarinn stækkar við hver hamskipti, en þá skiptir humarinn alfarið um ytri skel sína.
Heiti verkefnis. Landeldi á Evrópuhumri (Homarus gammarus)
Verkefnisstjóri: Ragnheiður Þórarinsdóttir, Svinna-verkfræði ehf.
Tegund styrks: Frumherjastyrkur
Styrkár: 2013-2014
Fjárhæð styrks: 14 millj. kr. alls
Tilvísunarnúmer Rannís: 131763-061
VERKEFNIÐ VAR STYRKT AF TÆKNIÞRÓUNARSJÓÐI.
Verkefnið var unnið á vegum Svinna-verkfræði ehf. í samstarfi við Þekkingarsetur Suðurnesja í Sandgerði, Rannsóknasetur Háskóla Íslands á Suðurnesjum, Náttúrustofu Suðvesturlands og Sæbýli á Eyrarbakka. Auk þess tengist verkefnið norrænu samstarfsverkefni sem unnið er í samstarfi við Norwegian lobster farm í Noregi og DTU-Aqua í Danmörku. Á verkefnistímanum var byggt upp formlegt alþjóðlegt tengslanet sem nefnist European Lobster Centre of Excellence (ELCE) sem miðar að því að auka þekkingu á Evrópuhumri og miðla henni milli þátttakenda. Þrjár ráðstefnur hafa verið haldnar á vegum ELCE samstarfsins, í Englandi 2013, Skotlandi 2014 og Noregi 2015. Næsta ráðstefna verður á vormánuðum 2016 í Svíþjóð.