Hlývatnseldi á hvítfiski - verkefnislok
Markmið verkefnisins var að koma á fót nýrri atvinnugrein, hlývatnseldi á hvítfiski, með framleiðslu á matfiski til útflutnings. Nýnæmið er fólgið í því að koma upp nýjum atvinnuvegi á Íslandi og nýrri útflutningsgrein sem getur skilað töluverðum gjaldeyristekjum og skapað ný störf, sérstaklega á landsbyggðinni. Í því felst að nýta jarðvarmann og kalda vatnið til uppbyggingar nýrrar matvælastóriðju þar sem lögð er áhersla á framleiðslu gæðaafurða til útflutnings. Tæknilegt nýnæmi er fólgið í því að koma upp arðbæru hlývatnseldi í lokuðu kerfi þar sem jarðhitavatn og kalt vatn er nýtt til framleiðslunnar.
Heiti verkefnis: Hlývatnseldi á hvítfiski
Verkefnisstjóri: Stefanía K. Karlsdóttir, Íslensk matorka ehf.
Tegund styrks: Verkefnisstyrkur
Styrkár: 2010-2012
Fjárhæð styrks: 23,5 m.kr. alls
Tilvísunarnúmer Rannís: 101230
VERKEFNIÐ VAR STYRT AF TÆKNIÞRÓUNARSJÓÐI.
Helstu niðurstöður verkefnisins eru þær að hlývatnseldi á Íslandi er samkeppnishæft við eldi erlendis. Ljóst er að gífurleg tækifæri felast í auknu fiskeldi á Íslandi og ef rétt er á málum haldið er hægt að margfalda framleiðslu í fiskeldi á Íslandi. Hér er nægt magn af köldu og heitu/volgu vatni, raforku á viðunandi verði sem auk þess er framleitt með endurnýjanlegum orkugjöfum, stutt er á markaði í Evrópu með ferskan fisk og áratuga reynsla og þekking er hérlendis á framleiðslu, flutningi og sölu á hágæða fiskafurðum.
Ávinningur verkefnisins er að markviss uppskölun á hlývatnseldi hérlendis er hafin. Markaðsmál á hlývatnstegundum eru komin á fullt skrið með beinum samskiptum við markaðsaðila erlendis og innlenda söluaðila. Markaðsvinnan hefur jafnframt leitt í ljós að tækifæri eru fyrir vottaðar afurðir á mörkuðum í Evrópu. Um er að ræða umhverfisvottanir eða jafnvel lífrænt vottaðar afurðir. Aðstæður á Íslandi eru til staðar fyrir framleiðslu á vottuðum afurðum. Verð á hlývatnsfiski á mörkuðum í Evrópu er á breiðu bili og fer verðlagning eftir því hvort fiskur er seldur heill eða í flökum, frystur eða ferskur. Uppruni hráefnis og sérmerkingar hafa áhrif á verð og inn á hvaða markaði er farið með vöruna. Reynslan sýnir að verð á hlývatnstegund frá Íslandi er á svipuðu róli og öðrum eldisfiski frá Íslandi.
Afrakstur:
Helsi afrakstur verkefnisins er meiri og dýpri þekking á nýtingu vatns í fiskeldi og nýtingu jarðvarma til eldis á hlývatnsfiskum. Þekking í formi ráðgjafar hefur orðið útflutningsvara, þar sem margir erlendir aðilar leita ráðgjafar hjá fyrirtækinu. Einnig hefur verið myndað tengslanet við erlenda framleiðendur, markaðsaðila, aðila innan tæknigeirans og rannsóknaraðila.
