Óskað eftir tilnefningum til vísindamiðlunarviðurkenningar
Viðurkenning Rannís fyrir vísindamiðlun verður veitt við opnun Vísindavöku 2019, sem haldin verður í Laugardalshöllinni laugardaginn 28. september kl. 15:00-20:00. Lilja Alfreðsdóttir, mennta- og menningarmálaráðherra afhendir viðurkenninguna fyrir hönd Rannís.
Viðurkenning fyrir vísindamiðlun er veitt einstaklingi, stofnun, fyrirtæki, samtökum eða verkefni, sem þykir hafa staðið ötullega að því að miðla vísindum og fræðum til almennings á áhugaverðan hátt.
Tilnefningar sendist í tölvupósti til Rannís í síðasta lagi 23. september nk. í netfangið visindavaka@rannis.is
Til að hljóta viðurkenningu fyrir vísindamiðlun, skal hún hafa stuðlað að bættum skilningi almennings, barna, ungmenna og fullorðinna, á vísindum og fræðum og á mikilvægi þeirra fyrir íslenskt samfélag. Einnig skal vísindamiðlunin hafa vakið athygli á starfi vísindamanna og á mikilvægi rannsókna og nýsköpunar í íslensku samfélagi.
Hér má finna upplýsingar um fyrri handhafa viðurkenningarinnar, en Sjónvarpsþættirnir Fjársjóður framtíðar hlutu viðurkenninguna á Vísindavöku 2018 og á myndinni hér að ofan má sjá teymið sem vann að þáttunum ásamt Lilju Alfreðsdóttur mennta- og menningarmálaráðherra og Hallgrími Jónassyni forstöðumanni Rannís.
