Úthlutun úr Menntarannsóknasjóði 2021
Mennta- og menningarmálaráðherra hefur úthlutað styrkjum úr Menntarannsóknarsjóði 2021. Alls bárust 23 gildar umsóknir í sjóðinn og hlutu fjórar þeirra styrk að upphæð 72.547.500 kr.
Menntarannsóknasjóður styður hagnýtar menntarannsóknir á sviði leikskóla, grunnskóla, framhaldsskóla, náms á framhaldsskólastigi og frístundastarfs.
Markmið sjóðsins er að styrkja stoðir hagnýtra menntarannsókna, auka tækifæri til að skapa og miðla þekkingu til framþróunar og umbóta í skólastarfi og styðja við framkvæmd menntastefnu til 2030.
Árið 2021 voru þessar rannsóknaáherslur í brennidepli:
- Nám og kennsla nemenda með fjölbreyttan menningar- og tungumálabakgrunn.
- Skólaforðun og brotthvarf úr námi.
- Nám og kennsla í náttúrugreinum, raungreinum eða tæknigreinum.
Styrktegundir voru tvær, annars vegar styrkir til rannsóknaverkefna og hins vegar styrkir til doktorsnema. Alls bárust 23 gildar umsóknir, 14 um rannsóknaverkefni og 9 frá doktorsnemum. Niðurstaða ráðherra, að fengnu mati fagráðs og með hliðsjón af tillögu úthlutunarnefndar, var að styrkja tvær umsóknir í hvorum flokki, alls að upphæð krónur 72.547.500.
Verkefnisstyrkir:
Verkefnin eru bæði til tveggja ára. Tekur það fyrra til áherslunnar um nám og kennslu nemenda með fjölbreyttan menningar- og tungumálabakgrunn; hið síðara leggur áherslu á skólaforðun og brotthvarf úr námi.
| Verkefnisstjóri | Aðsetur verkefnis | Heiti verkefnis | Upphæð (kr.) |
| Kathryn Margaret Crowe | Háskóli Íslands | Orðaheimurinn á Íslandi | 23.707.500 |
| Kristjana Stella Blöndal | Háskóli Íslands | Margbreytileiki brotthvarfsnemenda: Raddir nemenda | 24.850.000 |
Doktorsnemastyrkir:
Fyrra verkefnið er til eins árs en hið síðara til tveggja ára. Bæði leggja þau áherslu á skólaforðun og brotthvarf úr námi.
| Doktorsnemi | Aðsetur verkefnis | Heiti verkefnis | Upphæð (kr.) |
| Heiður Hrund Jónsdóttir | Háskóli Íslands | Sjálfsmynd og skólaviðhorf nemenda í tengslum við skuldbindingu þeirra og brotthvarf frá námi: Langtímarannsókn á meðal framhaldsskólanema | 7.995.000 |
| María Jónasdóttir | Háskóli Íslands | Stytting námstíma stúdentsprófsbrauta: Áhrif á inntak bóklegs náms á framhaldsskólastigi og áframhaldandi nám á háskólastigi | 15.995.000 |
Birt með fyrirvara um innsláttarvillur.
Upphæðir geta breyst við samningagerð.
